هل هنقدّر الجمال في كل الأوقات؟

سنة 2007 وقف واحد يعزف ب Violin في واحدة من محطات المترو في واشنطن ساعة صبحية كدة، والناس رايحة شغلها، عادي واحد بيعزف مستني ناس تديله حاجة كنوع من الكَسب بطريقة شيك يعني، لحد هنا عادي!

في خلال 45 دقيقة عزف 6 مقطوعات لـ "باخ"، ومر من قدامه قرابة ال 1100 شخص، كانوا في طريقهم للشغل، وبمرور الوقت واحد ورا التاني يعدي، اللى يبص عليه ويمشي، واللى يقف ثواني، واللى يقلل من سرعته لما يقرب منه، واللى يقف شوية صغيرين ويحطله فلوس ويمشي والأطفال رغم أنهم كانوا مهتمين جدا بالسماع ومبسوطين إلا إن الأهل برضه كانوا بيخلوهم يمشوا بسرعة وهكذا، وبانتهاء 45 دقيقة نجح في جمع 32 دولار بس، رغم إن الشخص ده كان بيعزف على Violin تمنها 3.5 مليون دولار، تذكرة حفلته قبلها بيومين بس كانت ب 100 دولار، وال 6 مقطوعات اللى عزفهم من أصعب المقطوعات في العالم، ومع ذلك من ال1100 شخص، محدش وقف يسمعه غير 6 أشخاص بس، ومحدش سابله فلوس غير 20 شخص، ومع انتهاء العزف شخص واحد بس هو اللى سقفله!

عازف ال Violin هو Joshua Bell و دي كانت تجربة اتعملت من خلال "واشنطن بوست"، كجزء من تجربة إجتماعية بتناقش "ادراك الناس" وهل هيدركوا أن في حد بيعزف مثلا، "الذوق"، و "الأولويات" في ظل ما هما منشغلين ورايحين الشغل، هل هيقفوا ويسمعوا؟

وكانت الفكرة الاساسية هي: - هل احنا بندرك الحاجات الحلوة في وقت ومكان غير مناسبين؟ يعني رغم أنه عازف عالمي، إلا انهم كانوا رايحين شغلهم وده مترو!، وده أدّى إلى إن 6 من 1100 بس اللى قدروا يقفوا ويسمعوه! - هل احنا هنقدر نقف ونقدر الجمال ده؟ - أولويات الناس فين؟ - هل عشان Joshua Bell لابس عادي، الناس هتسيبه؟ فهل احنا بنحترم الشخص بس في مكان معين وهيئة معينة، والناس اعتبرته متسول مثلا؟

وكانت واحدة من الاستنتاجات للتجربة دي الحقيقة أنه إذا كان معندناش وقت نقف ونسمع وننتقي الجمال من حوالينا ونسمع واحد من أفضل العازفين في العالم، فإيه كم الأشياء الجميلة التانية اللى بتفوتنا واحنا مش واخدين بالنا؟

الموضوع يستحق التفكير، والحقيقة رغم إن التجربة سلطت الضوء للعالم الخارجي إلا أن في عالم داخلي نسيناه خالص وهو "أحنا"، كم الحاجت الحلوة اللى جوة كل شخص فينا، وهو مش قادر يدرك ده، في وسط دوشة وزحمة كل يوم، هو مش قادر يميز أنه كويس في كذا وكذا، وأنه شكلها حلو على فكرة مش زي ما أصحابها بيقولوا، مش محتاجة كل ده، وأن اللدغة دي لطيفة، وإن الشكل مش كل حاجة، وإن إدراكنا لذاتنا بيساعدنا على التفاعل بشكل ما مع المجتمع.. فلازم قبل ما إدراكنا يكون مركز على عيوبنا بس، نتعود نشوف جمالنا الداخلي ونحترم ذواتنا ونقدرها، وننتبه لنفسنا، ونقعد ونفكر هل فعلا ده عيب، هل دي مشكلة، عشان صعب جدا يكون عمرك سنين، ومتقعدش يوم واحد مع نفسك وتعرفها كويس!، استعن بالله ولا تعجز..

التجربة:

1. https://www.youtube.com/watch?v=3kpmbq4KQyo

2. https://www.youtube.com/watch?v=BJhZ0J3bIYc

ومقطوعات باخ (تستاهل تتسمع الحقيقة):

https://www.youtube.com/watch?v=6JQm5aSjX6g