The IKEA Effect (Why we Overvalue what we make?)

ليه الأمهات بتتضايق لما نجيب أكل من برة؟ ليه ماما طول عمرها هتفضل تشوف الكيكة بتاعتها أفضل كيكة في الحياة، وأفضل مكرونة، وملوخية، وأفضل حاجة في كل حاجة في الدنيا يعني.. طب بلاش، طب ليه الناس بتحب IKEA؟ بعيدًا عن إن منتجاتهم جميلة فعلا، وتحف فنية في نفسها يعني! وبعد بحث طويل (مش طويل أوي يعني) وجدنا إن السبب واحد، اللي بيخلي الأم شايفة أكلها وحاجاتها دايمًا الأحسن، هو نفس السبب اللي بيخلي الناس تحب IKEA، طب إيه السبب ده؟ بص يا سيدي.. من زماااان انتشرت فكرة الأكلات اللي بتتجهز في علب، وبطرق بسيطة تقدر تعملها أنت في البيت، زي مثلا ال Cake Mix هتلاقي العلبة فيها شوية بودرة، وبيقولك هات بيضتين وشوية لبن وحط في الصنية، وفي الفرن لمدة كذا وهتطلعلك أحلى كيكة..

وده لأن في مبدأ متحيز في البشر مفاده أن "We over value what we make"، بنعطي قيمة للأشياء اللي بنبذل فيها جهد، مهما كانت وحشة أو حلوة، فماما طول عمرها هتفضل تشوف كل اللي بتعمله هو أحسن حاجة في الدنيا مثلا!

كذلك IKEA هتلاقي عندهم ميزة مش موجود عند غيرهم كتير، وهي أن منتجاتهم بتيجي دايما متفككة، وكل منتج مع ورقة تعليمات ازاى تركب الكرسي ده، ازاى تركب الطرابيزة دي، وواحدة واحدة بتركبها، وتحس بإنجاز أنك عملت ده لوحدك.. وده اللي اسمه النهائي "The IKEA Effect".

- في تجربة جابوا مجموعتين من الناس، مجموعة هتعمل Origami ، ومجموعة هتقيّم ده وهتديله سعر..والمجموعة اللي هتنفذ ادوهم ورقة فيها الخطوات، وفعلا نفذوا الأشكال ورغم أنها كانت مش أحسن حاجة، وشكلها وحش إلا أنهم حبوها جدا وكانوا على استعداد يبيعوها بأعلى الأسعار الممكنة، لكن المجموعة التانية كانوا شايفين أنه إيه القرف اللي عملتوه ده يا جماعة مستحيل نحط فلوس هنا طبعا؟

- في تجربة تانية جابوا مجموعتين بقة والاتنين هيعملوا Origami برضه، بس مجموعة معاها تعليمات أسهل، ومجموعة تعليماتها أصعب، وجدوا إيه؟ نفس اللي وجدوه في التجربة الأولى بس المجموعة التانية اللي كان معاها تعليمات أصعب، حبوا اللى عملوه جدااا، لأنهم بذلوا جهد أكبر وأكبر رغم أنه طلع شكله أسوأ..

طب بلاش..تعرف ال "Ugly baby syndrome"؟ أو متلازمة الطفل القبيح، تخيل ابنك أو بنتك كانت قبيحة "شكلا" هتفضل تحبها؟ أيوة طبعا هتحب ولادك، دي حاجة كدة معناها أننا بنحب أولادنا لأنهم أولادنا، بذلنا فيهم جهد في تربيتهم، مش عشان هما الأجمل مثلا، هما مفهومش ميزة واضحة غير كدة، هكون شايفهم الأفضل في الدنيا، وده اللي بيخلي ناس تتحيز لأفكارها وتتمسك بيها، رغم أنها ممكن متكونش الأحسن..

طب نطلع من ده كله بإيه؟ ـــــــــــــــــــــــــــــــــــــــ 1. لما تكون في Project حاول قدر الإمكان أنك تخلي الناس تشتغل بإيدها في أي حاجة.. 2. لما تكون في Session أو محاضرة أو أي لقاء تعليمي مثلا دايما خللي وقت للناس تجرب وتطلع منتج من اللى أنت كنت بتشرحه.. 3. كل ما تكون هناك فرصة اختيار بين انهم يعلوا حاجة ولا نشتريها، لأ جربوا تعملوها أحسن.. 4. لازم تقدر حب الناس وإعطائهم قيمة للأشياء اللي بيعملوها، مهما كنت شايفها أنت وحشة، ومش مستاهلة الوقت ده كله.. 5. الهاند ميد غالي عشان فيه وقت وجهد وروح الناس اللي بتعمله، هما شايفينه Masterpiece مش فكرة الشكل ولا الجودة بس..

المرة الجاية لما تلاقي حد معجب جدا بحاجة عملها، متقللش منه ومن حاجته، هو شايفها أعظم حاجة في الدنيا، زي ما أنت كمان هتشوف حاجتك كدة، كل واحد بيتحيز لما صنعت يداه، وكل جهد بيبذله في سبيل أي حاجة بيزود حبه ليها، استعن بالله ولا تعجز.. "Reference"

1. The “IKEA Effect”: When Labor Leads to Love

https://www.hbs.edu/faculty/Publication%20Files/11-091.pdf 2. https://www.youtube.com/watch?v=llbAXa8-Q4E