الأخطاء الأكثر حماقة

كلنا بنغلط عادي، بس في غلطات كدة بتحس أنه "لأ، إيه الغباء ده؟"، حاجات كدة بتحس أنها شديدة الحماقة يعني، مش مجرد غلطة عادية بتحصل، لأ ده أمر لو فيك ذرة عقل مكونتش هتعمله!

التاريخ مليان بمواقف كتير بتدل على ده زي مثلا:

- قصة حصان طروادة الشهير اللي ذكرها هيوميروس في الإلياذة، واللي ميعرفهاش فالخلاصة يعني أن الإغريق حاصروا مدينة طروادة لمدة 10 سنوات تقريبًا، فكانوا محتاجين وسيلة يدخلوا بيها المدينة، فبنوا حصان خشبي طوله حوالي 108 متر، ووزنه حوالي 3 طن، لكنه أجوف من جوة، وملوه بالجنود، وبعتوه لطروادة، ومن خلال جاسوس في مدينة طروادة أقنع الملك أن الحصان ده هدية سلام، وإن الإغريق استسلموا وهيرجعوا، وبالفعل قبل الملك وقتها الحصان ودخل المدينة طبعا بعد فحصه كويس كمان..

استنى الجنود الموجودين في الحصان لحد الليل، والناس غرقانة في احتفالاتها وسكرها، وخرجوا من الحصان، وقاموا بفتح أبواب مدينة طروادة لباقي أفراد جيش الإغريق ودخل الإغريق طروادة بعد 10 سنين، بسبب خطأ غير منطقي!!

- برج بيزا المائل، واللي ارتفاعه حوالي 56 متر، واللي استغرق بنائه حوالي 199 سنة، واللي الحقيقة ميلانه مش معجزة هندسية ولا حاجة، هو كل الفكرة أنه مال بفعل عوامل في التربة في المراحل الأولى من بنائه، وحاولوا يظبطوه ويحطوله دعامات تسنده، وهكذا، لكن ده فشل، وده خطأ هندسي فادح جدا يعني..

- الحكومة الفرنسية مؤخرًا أنفقت حوالي 5 مليار دولار على شراء قطارات، واللي أكتشفوا أنها أكبر حجما من أرصفة حوالي 1300 محطة قطارات عندهم فبالتالي الصفقة كانت كارثية بسبب خطأ غريب جدا..

- وكالة ناسا الفضائية مسحت التسجيلات الخاصة بالصعود للقمر، بل الأنيل يعني أنهم سجلوا على الشرايط دي حاجات تانية!

- في قصة سرقة في أمريكا بيحكوا فيها أن في حرامي سرق بيت، وهرب، وكان من ضمن المسروقات شاشة كبيرة، اتمسك لما رجع الشقة تاني عشان ياخد الريموت بتاعها!

- مجموعة من الحرامية في أمريكا سرقوا محل تليفونات فبالغلط سرقوا اجهزة GPS معاهم، فالحكومة قدرت تحدد مكانهم بالظبط في أقل من ساعة..

- في مدينة بيتسبرج في عز النهار، واحد كان عاوز يسرق بنكين في عز النهار، من غير ما يلبس ماسك على وشه، معتقدا أن عصير الليمون اللي دهنه على وشه هيخليه ميبانش في الكاميرات على أساس أنه حبر سري وكدة!

في تجربة على الطلاب في جامعة كورنيل ، في قياس مهاراتهم في اللغة، الدعابة، المنطق، واللي عملها David Dunning and Justin Kruger، وبعد ما خلصوا الأسئلة، سألوا الأشخاص اللى كانت درجاتهم ضعيفة جدا متوقعين يكونوا عملوا إيه؟

الطلاب دول جاوبوا أنهم مفروض يكونوا من أصحاب الدرجات العالية جدا بكل ثقة كدة، وده اللي اتسمى ب "Dunning-Kruger effect"

وفيه بيعملوا علاقة بين "الثقة" و"الأداء"، وفيه الأشخاص اللي كانوا بيأدوا أسوأ كان عندهم الثقة الأكبر في أنهم أحسن..

وده يمكن اللي بيخلينا نعمل أخطاء كتير جدا نابعة من الثقة الزيادة اللي عندنا، أننا صح، وأننا واثقين في اختيارنا، فبينتج عندنا كم من الأخطاء العادية، وكم تاني غير عادي وغير منتهي من الأخطاء الحمقاء للأسف، المهم إن الثقة دي بتعميك عن تقبل حقائق كتير، عن الحساب الجيد للنتائج، زي طروادة وغيرها، المهم لما تيجي تاخد قرار، لازم تعرف أن في اللحظة اللي بتظن فيها أنك الأكثر ذكاءًا على وجه الكوكب، هي اللحظة اللي فيها بتحط أول خطوة في طريق أنك ترتكب أكثر الأخطاء حماقة في حياتك..

استعن بالله ولا تعجز.. References

1. Dunning–Kruger effect

https://en.wikipedia.org/wiki/Dunning%E2%80%93Kruger_effect

2. Trojan Horse

https://en.wikipedia.org/wiki/Trojan_Horse

3.https://en.wikipedia.org/wiki/Leaning_Tower_of_Pisa