هل ممكن نكره أهلنا؟

البديهة بتقول لأ، وزي ما أستاذ حسين فهمي بيقول: انت مش بتحب أمك عشان هي أجمل ست في الدنيا وكدة، و"أمك ثم أمك ثم أمك ثم أبوك" وحاجات كدة.. وكمية الآيات والأحاديث والتوصيات بالأهل، وأنك لازم تطيع أمرهم في أي شئ في الدنيا، فيما عدا الشرك بالله..

طب ليه بنسمع مثلا حد بيقول كلام من نوعيات، دي ماما مكفراني؟ ده أبويا مطلع عيني؟، ليه في ناس البيت بالنسبة ليها مبقاش المكان المثالي للعيشة، وبيتمنوا يخرجوا منه النهاردة قبل بكرة وتكون ليهم حياة مستقلة؟

فنظريًا أنت مفروض تحبهم وتكون تحت طوعهم جدااا، بس عمليًا ماذا لو كان الأهل فعلا مش بيأدوا واجبهم تجاهك؟ الأم هي أكتر حد مفروض يكون بيقعد معاك مثلا، فماذا لو كانت الأم بتغيب عن البيت بالساعات، في شغل مثلا.. الحرمان من الأم ده مين هيعوضه، مين هيربي أطفال من أول ما يتولدوا، فين حق التربية، والاستماع، وحل المشاكل، ماهو أنتي مش بتشتغلي عشان تجيبي فلوس، في حاجات تانية لا يمكن هتشتريها بفلوسك خالص يعني.. فمش هتسيبي عيالك يطلعوا مشوهين، وتقولي أصل كنت بشتغل! لو الأم سابت عيالها وقت كبير، سنة، اتنين، هل لما ترجع هياخدوها بالحضن مثلا؟

وجدوا ان الأطفال اللى عمرهم 3 سنين بس، لو أمهم غابت عنهم فترة طويلة، بيعيطوا في الأول، بتوحشهم، بس بعد كدة لو رجعت عمرهم ما بيستقبلوها غير بكل برود، وكأنهم أول مرة يشوفوها أصلا، ولا كأنها أمهم! واللي بيحصل ده اسمه "Detachment"، خلاص أنا مش محتاجك، أنا اتعودت على غيابك..

فالأم هي مصدر الأمان ووجودها مهم حتى لو كانت أم مش كويسة 100%، لكن عدم وجودها هو المشكلة..

It doesn't matter she hurts or hugs, Separation from mother is worse than being in her arms when the bombs are exploding. Separation from mother is sometime worse than being with her when she's the bomb..

ده طبعا بخلاف الأب، اللى فاكر أن وجود في حياة أولاده زي وجود ال ATM، مصدر للفلوس فقط، رغم أن دوره أكبر من كدة، بس بيقرر يتخلى عن كل الأدوار دي، وكل ما هتتكلم، هيقولك، أنا مش بشتغل وبيجيب فلوس، هو عشان مين، مش عشانكم؟

عشان كدة الأطفال اللي مش بيلاقوا رعاية كافية من صغرهم، بيتبقى عندهم Scars ممكن ميعرفوش يحبوا ويتحبوا ويتعاملوا مع المجتمع بشكل طبيعي للأسف..

فالأباء والأمهات زي ما واجبنا نحترمهم ونقدرهم، واجب كمان عليهم أنهم يقدموا لينا الرعاية الكافية، مش بنخلف ونرمي، وندخل ولادنا في مشاكل ونلاقي أن نسبة كبيرة من عيادات النفسية أسبابها أصلا ال Neglect وال Abuse ولو معملتش هضربك ولو معملتش هشيل الألعاب، هرميهم في الزبالة، هكهربك، المقارنة، وشوف ابن خالتك، وشوفي بنت عمتك جالها إيه، وانتي عريسك معفن مش هيجيبلك حاجة، لأ أكيد مش بيحبك، انت جبت 70%، ما أنت فاشل يا خسارة تعبي وشقايا!

في كام بنت دخلت علاقات عاطفية كتيرة وأهلها معرفوش ودخلت في مشاكل كل ده عشان خايفة تحكي ليهم؟ في كام ولد معرفش حاجة عن نفسه وعدي كل مراحل حياته من غير أب وام يفهموه؟ بدل ما نشجع، بدل ما نسمع، بدل ما نحاوط ولادنا، بنرميهم في مجتمع، ينهش فيهم، ونرجع نقول أصل احنا مربيناش؟

فقبل ما نطلب أننا نعمل كل حاجة لأهلنا، هما كمان لازم يعرفوا حقوقهم وواجباتهك علينا، إلا بقة لو أنت ابن عاق ومش فارقة معاك، ساعتها حسابك عند ربنا بقة، بس زي ما أنت كإبن هتتحاسب، الأهل كمان لازم يعرفوا إنهم مسؤولين، وفي النهاية، لو مش عارفين تربوا، يبقى متخلفوش يا جماعة غير لما تكونوا قادرين على التربية والخطوات دي، واستعن بالله ولا تعجز..