هل ممكن تستغنى البنت عن الولد في الإنجاب؟

أنثى الفأر مع أولادها الناتجين من نوع واحد فقط

يعني النكتة بتاعة الانقسام الميتوزي، وهنقسم بـ "التبرعم" ويطلعلي حتة بُرعم صغير كدة، وينفصل منها، ويبقى حتة عيل صغير، بعد فشل مُحاولات الإقناع المتكررة بالزواج وأنه سنة الحياة وكدة..

بص يا سيدي خليني أقولك إن العلم مخلاش حاجة إلا وبيدور فيها، وبيجري وراها ويجربها، هو أينعم لو رجعنا للدين وكدة هنوفّر كل التجارب دي بس خليني أقولك اللي حصل.. شهر أكتوبر 2018 حصل حدث مهم جدا وكنت متوقع تتقلب عليه الدنيا، بحث غريب اتنشر في مجلة Nature، واحدة من أهم الدوريات البحثية (إن لم يكن أهمها) في العالم..

فريق من العلماء دار في بالهم سؤال لطيف اشمعنى في كائنات زي الأسماك، الطيور، السحالي مثلا، ممكن تتكاثر عن طريق نفس الجنس، لكن "الثديات"، واللي هي على رأسها الانسان ومن ضمنها الفئران مثلا لازم نحتاج "جنسين" مختلفين (ذكر وأنثى)!

قبل ما أكمل كلامي خليني أديك نبذة مختصرة كدة عن الوسائل المساعدة على الإنجاب، ده ببساطة شديدة بيكون في مشكلة في وصول الحيوان المنوي لتخصيب البويضة داخل قنوات الرحم، وده بسبب مشاكل كتير جدااا سواء في الذكر أو الأنثى، فنعمل إيه؟ ببساطة هتاخد الحيوان المنوي والبويضة دول تخصبهم برة في بيئة مساعدة، وبعدين لما يوصل الجنين لمرحلة معينة، برجع نزرعه في رحم الزوجة، وبيكبر ويكمل دورة حياته..

- تركيب بويضة الأنثى دايما 23+X ومستنية دايما الذكر اللي هيديها 23+X فيبقى معانا 46+XX وبكدة المولود يبقى "بنت"، أو إن الزوج يديها 23+Y وكدة الناتج يبقى 46+ XY ويكون الناتج مولود "ولد"..

طب تمام جدا، نيجي بقة للمهم، ماذا لو بعد ما خدت البويضة من الأنثى، اديتها المادة الوراثية بتاعة أنثى تانية؟ هي البويضة هتفرّق؟ يعني هتقولك لأ يا عم أنا عايزة بتوع الحيوان المنوي؟، ولا لو ادينالها 23+X من بويضة تانية ممكن تكوّن مولود؟

أنت فاهم حاجة؟ الموضوع نظريًا تحسه عادي، ما تيجي نجرب، ونعمل جيوش من النساء اللى بتخلف مع نفسها دي! وخلفتهم كلها بنات وحاجة فل جدا!! .. في البحث بقة اللى اتنشر إيه اللى حصل؟ وجدوا إن لو جبت مادة وراثية "DNA" من جنس واحد مش هينفع لسبب: في حاجة اسمها ال DNA tags ودي بتكون موجودة عشان تشتغل على جينات معينة مسؤولة عن نمو الجنين وهما حوالي 100 نسخة، ودي بتكون موجودة على نسخة من المادة الوراثية بتاعة الذكر ونسخة على الانثى.. اللطيف إنها بتكون شغالة في جنس واحد منهم بس، بمعنى مينفعش نجمع مادتين وراثيتين من نفس الجنس لأنهم مش هيشتغلوا حاجة كدة زي القفل والمفتاح، مينفعش تحط قفلين ولا مفتاحين على بعض.. .. **طب ما بسيطة يعني، ما نشيلهم! إيه؟، أه نشيلهم، مش أنت خايف يحصل قفلة، خلاص هشيلهم من نسخة واحدة، وزي الفل كدة ويالا نجرّب وبعد تجارب كتير والمحاولات الفاشلة الكتير، عشان يعرفوا هيشيلوا ال DNA tags دي من أنهي نسخة وأماكنهم فين وهكذا، وزي الفل كدة.. .. - وعشان الصين بلد جميل، التجربة كانت في الصين، وبعد ما شالوا ال DNA tags دي، وجابوا مادتين وراثيتين من نفس الجنس واللي كان هنا الفئران اللي قولنا انها ثديات ومحتاجة ذكر وأنثى عادي..

- نجحوا في إنتاج 29 فأر صغير من ناتج 2 أنثى! و 12 فأر من ذكرين (أه ممكن الذكور برضه بس ناتج الذكور مات بعد يومين من مشاكل في التنفس)..

الله أكبر، يعني كدة ممكن أجيب بقة بنت وأقولها انتي مش عايزة تتجوزي مثلا، فخلاص تعالي نجيب مادة وراثية بس بتاعة بنت تانية، ويالا هوبا، وتحملي وكدة!

ودي تيجي برضه؟ نسبة نجاح التجربة دي على الفئران كانت "14%" في الإناث، و"2.5%" في الذكور لذلك صعب جدا إنه يتطبق على البشر طبعا (بعيدًا عن أخلاقيات العلم وكدة)، بالاضافة إن الفئران اللى طلعت دي احنا مش عارفين هما هيعملوا إيه بعد كدة، يعني هل هيكونوا طبيعيين ولا إيه ظروفهم؟ والتجربة دي كدة قالت لنا حاجتين: 1. أيوة لازم ذكر وأنثى يا جماعة مش أي هري يعني 2. كمان عرفنا ليه بيفشل في نفس الجنس.. المصادر: https://www.nature.com/articles/d41586-018-06999-6