مصر تتقدم للمركز الثاني في البحث العلمي!

لحد سنة 1980 كان في 5 دول بس في العالم هما المشاركين بنسبة 90% في إنتاج الأبحاث العلمية وهما "أمريكا، انجلترا، فرنسا، ألمانيا، اليابان"، بعد الفترة دي ابتدت باقي الدول تشد حيلها لحد ما وصلنا تقريبًا إلى 40 دولة في العالم بتنشر أوراق بحثية في المجالات العلمية المختلفة.. طب معلش سؤال "مصر" منهم؟ هو الحقيقة أنا كنت متوقع أنه طالما في وقت احنا كنا 139 من 140 في التعليم فإزاى هنكون بننتج أوراق بحثية تنافس الدول دي، بس بناءًا على نتائج شركة "Clarivate Analytics" والمهتمة بالإحصاء والتقارير عن الأبحاث دي في خبر اليومين دول قالت: أن "مصر" كانت ثاني أكبر دولة في العالم من حيث زيادة نسبة عدد أبحاثها العلمية بنسبة تصل إلى 15.9% مقارنة بالسنة اللى قبلها وبكدة تكون على رأس ال 40 دولة بعد باكستان "اول دولة"..

بس خللي بالك هي مش الدولة الأولى في عدد الأبحاث، بمعنى أنا كنت بعمل 10 أبحاث دلوقتي بعمل 20 فكدة نسبة الزيادة 100%، لكن مينفعش أقارن نفسي بدولة بتعمل الف بحث مثلا فالمرة دي عملت 1100 فكدة نسبة الزيادة 10% فأقول أنا جامد جدا كدة.. فده اللى حصل، احنا بنتكلم في نسبة الزيادة مش الزيادة الكلية، يعني لازالت مثلا أمريكا هي الدولة الأولى في العالم من حيث عدد الأوراق البحثية وتليها الصين..

الحقيقة إن المسؤولين عن الشركة مش عارفين يفسروا أوي سبب زيادة نسبة مصر، ودولة زي باكستان مثلا، لكن بيرجحوا ده بسبب إن بقة في فلوس أكتر بتتدفع للأبحاث ودعمها يعني، وسبب كمان زي ما قولتلكم فوق إن احنا كان عدد أبحاثنا قليل أوي فلما زاد رفع النسبة بشكل كبير لحوالي 15.9% بس دي نسبة زيادة مش عدد، المهم ده خبر لطيف، والله يا بلادنا الله وكدة ومجهود يحترم بصراحة من وزير التعليم د.طارق شوقي اللي عمل مشروعات زي ال EKB اللى بصراحة عليه دوريات علمية متاحة لكل الطلبة ومصادر عظيمة يعني.