هل تؤمن بالحظ السئ؟

لو كنت من المؤمنين بالحظ السئ في قانون بيقول:

“Any thing that can go wrong, will go wrong!”

أي شئ ممكن يمشي في الاتجاه الغلط، هيمشي في الاتجاه الغلط!، وده واحد من قوانين ميرفي للحظ السئ..

تخيل معايا اشتريت لعبة “Puzzle”، وبعد ما كونتها قررت تفكها وترميها على الطرابيزة عشان تلعب تاني، فالسؤال هنا: - ما هي احتمالية إن الأجزاء دي لما وقعت، أنها تقع منتظمة وتكون شكل ال"Puzzle" تاني بدون تدخل مننا؟

خد وقتك وفكر شوية، بس في الوقت ده هيكون حصل شوية حاجات كدة، زي مثلا في شوية خلايا في جسمك هتكون اتكسرت وماتت، كوباية الشاي اللي في إيدي دي هتكون بردت، في جرائم بتتم حواليك، وثورة بتحصل في السودان، وعلاقات وأحداث بتنتهي..

لا متقلقش أكيد أنت عارف إن مش هتاخد وقت أصلأ لأن الإجابة واضحة، هتجد إن احتمالية وقوع ال "Puzzle" دي بشكل منتظم هو مستحيل "عمليًا"، ده كل قطعة يا راجل لوحدها عالأقل هتقع في اتجاه مختلف، لكن لو بتفكر"حسابيًا" ده مش مستحيل وهو احتمال قائم طبعًا، مين يقدر يقول أنه مستحيل يقعوا فيعملوا ال "Puzzle" تاني!، محدش يقدر ينكر طبعًا، احنا مشوفناش صحيح، بس ده وارد..

تعالى نكبر الموضوع شوية..

لو ركزت في الأحداث اللي قولتهالك فوق هتلاقي دايما كل حاجة في حياتنا ماشية في إتجاه واحد، يعني مفيش مرة مثلا "ماما" قالتلك اشرب الشاي لا يسخن، لأ هو دايمًا هيبرد..

في قوانين الديناميكة الحرارية ده اسمه ال "Entropy"..

أنت عارف الطاقة؟

أيوة بالظبط لا تُفنى ولا تستحدث من العدم، ولكن تتحول لصورة أخرى، لذلك الطاقة هي خرجت من كوباية الشاي السخنة لهواء الأوضة الباردة، لكن لو حاولنا نخللي كوباية الشاي تفضل سخنة ساعتها هنكون محتاجين عامل خارجي وهو "الشغل"، بمعنى أنه للحفاظ على ثبات الأشياء أنت محتاج دايما تغير حاجة، لأن الكون كله حواليك ماشي في اتجاهات واحدة...

ماشي في الاتجاه اللي دايمًا محتاجك تتدخل عشان تلحقه، عاوز منك طاقة، يعني في هتلاقي دايمًا عشان تحصل الحاجة الكويسة، أنت بتتعب، لكن الحاجة الوحشة هي هتحصل من تلقاء نفسها، أنت بس سيبها..

فعلى مستوى الاقتصاد والشركات عشان الشركة تنجح فأنت محتاج بعض العوامل، زي فلوس وفكرة، وعمال، ونظام يمشوا بيه، لكن لو جمعت كل ده وسيبتهم في الشركة من غير رقابة، الشكرة هتبوظ، هما مش عارفين بيعملوا إيه، دايمًا محتاج اجتماعات، ومجهود، ومكافآت وتذكرهم بالهدف والمنتج، وتعلمهم وتتعب معاهم، لأن طريق النجاح واحد لكن الفشل له ألف طريقة، وده اللى بيخلي تقريبًا 80 % من الشركات الناشئة بتقفل بعد أقل من سنة ونص!

على مستوى المجتمع اللى بتعيش فيه لو قررت تسيب الناس بدون حكومة وقوانين منظمة بينهم، هتعم الفوضى في كل المجالات، والمستوى الأمني هينهار وكل واحد هيعمل اللى يعجبه، لكن عشان تظبط الدنيا دي أنت بتصرف وتعمل أمن، وتبذل جهد عشان تفضل مخلي النظام ده مفروض ماشي بدون فوضى..

على مستوى الجواز مثلا هتلاقي أن عشان الجواز ينجح محتاج شريك مناسب، وماديات، وشقة، وجهاز، وصفات شخصية كتيرة، وحب، ووفاء، واخلاص، وحاجات كتير أوي، لكن عشان يفشل، هو محتاج حاجة واحدة من دول بس تفشل!

لو بصيت عالمستوى الشخصي، هتلاقي أن أغلب الحاجات في حياتك لو سبتها فهي بتميل دايمًا إلى أنها تبوظ، علاقاتاك، شغلك، مذاكرتك، جسمك، وده قانون، لكن عشان تعكس كل ده فأنت محتاج طاقة، زي ما قولنا فوق، لأن عدم انتظام الأشياء ده "مش غلط" مننا، لكنه شئ لازم هيحدث..

طب أيوة يعني عاوز إيه؟

1.بص يا سيدي عشان تستفيد من الكلمتين دول لازم تتخيل أنك عندك سفينة مثلا، لو بتواجه موجة وأنت قررت تفصل المُحرك بتاعها، فهي تقدر تعدي الموجة لوحدها بدون تدخل منك، أنت هنا Passive مش بتعمل حاجة عشان الحاجة تنجح، هي كدة كدة هتنجح، لكن لو راكب طيارة مثلا، أنت متقدرش تسيبها ثانية واحدة، لزم دايما عينك مع الأجهزة والمحرك فأنت هنا Active، لو معملتش حاجة الدنيا هتبوظ والطيارة هتقع!!

وده معناه إنك تكون عارف إن دايمًا الحاجات بتميل لل Disorder فعشان تتظبط معانا لازم نبذل فيها، ونديها وقت ومجهود وتفكير، عشان نحاول نخليها تمشي في مسارها الصحيح..

2. أنت لو كحيت في ميدان عام مثلا محدش هيسمع كحتك دي أصلا، لكن لو كحيت في مكتبة مثلا، هتعتبر حاجة مزعجة جدا وكل الناس هتاخد بالها، وده لأن الشارع هو مكان مش منظم، مكان عنده High Entropy، بعكس المكتبة اللى هي Low Entropy، فلازم تعرف أن تأثير طاقتك هيقل كل ما كانت الفوضى والمشاكل أكبر، ونفس الطاقة دي لو بُذلت في مكان أقل فوضى، هتحدث فرق كبير جدا، فبرضه لازم نعرف نختار إيه الأشياء في الوقت الحالي اللى تتطلب مننا التدخل وايه ممكن يستنى..

وخليك فاكر زي ما قولتلك إن الأشياء بتميل أنها تبعد، تبوظ، تتغير، تفشل، وحدها بس الطاقة والجهد المبذول هو اللى يقدر يعكس المعادلة دي، استعن بالله ولا تعجز..