ازاي متنساش أي حاجة بتقرأها؟

في ناس كتير بتعاني من مشكلة كبيرة مع التطور اللي بنعيشه على مستوى "الكتابة" وتعدد مصادر الحصول على المعلومة، ومواجهتنا اليومية لألاف الأنواع من المحتوى، المشكلة دي هي أننا مش بنقدر نفتكر كل حاجة بنقرأها، فلو بتعاني من المشكلة دي، هقولك بعض الحلول (المجربة والمبنية على علم فعلا) هتفيدك إن شاء الله في المرة الجاية لما تيجي تقرأ..

بص يا سيدي خلينا نقسم أي حاجة بنقرأها ل 3 مراحل (قبل القراءة- أثناء القراءة- بعد القراءة)، وفي كل مرحلة هنعمل بعض الخطوات..

*** مرحلة ما قبل القراءة ( دي أهم مرحلة معانا)..

1. اختار الكتاب الصح.

قبل ما نقرأ أي مقال أو كتاب، للأسف أغلبنا بيرتكب غلطتين:

- بنقرأ اللى كل الناس بتقرأه، بغض النظر عن المحتوى وعلاقته بينا واهتمامتنا..

- بنجبر نفسنا على قراءة موضوعات أو كتب أحنا أصلا مش مهتمين بيها أو بنحبها، وده ظنًا مننا أننا لازم نقرأ الموضوعات دي عشان نبقى جامدين جدا وكدة..

وطبعا مع زيادة أعداد الكتب، والمقالات، والمحتوى اللي بيصدر كل يوم، ده مينفعش، هتقرأ إيه ولا إيه؟

فالحل في المرحلة دي:

* متجريش وراء أي كتاب معمول عليه ضجة وخلاص..

* لما تيجي تاخد اقتراحات ناس للكتب، اختار ناس مختلفين فكريا عن بعض وعنك..

* جرب قراءة فعلا في أي كتاب حابب تقرأه، لو لقيت نفسك بتقلب في الموبايل وكل شوية تسيبه، يبقي متكملش يابني، مش عافية يعني، أنت كدة مش مهتم بالموضوع ده..

2. اربط اللي بتقرأه بـ (ليه؟)

طبعا حاجة حلوة احنا بنقرأ للمعرفة العامة وتوسيع مداركنا وكدة، بس لو معندناش سبب واضح احنا بنقرأ ليه، قدرتنا على التذكر هتقل جداا

في تجربة جابوا مجموعتين من الناس، وادوهم كتاب يقرأوه، المجموعة الأولى اتطلب منها أنهم هيمتحنوا في الكتاب ده، والمجموعة التانية اتطلب منهم أنهم هيدرسوا الكتاب ده لغيرهم..

وجدوا أن المجموعة التانية كانت أكثر تذكرا لمحتوى الكتاب، لأن السبب أقوى، لازم أعرف التفاصيل وأقرأ كويس عشان أقدر أدرس ده لغيري..

* فلااااازم يكون عندك هدف من قراءة أي حاجة قبل ما تبدأ..

3. خد فكرة عامة عن الكتاب ده قبل القراءة..

يعني قبل ما تبدأ القراءة التفصيلية بتاعتك، مش فكرة أنك تقرأ الفهرس وتفر كدة، لأ بالعكس..

أنت محتاج تعرف:

- الكتاب ده نظري ولا عملي؟

- الكتاب متقسم إزاى؟

- الكتاب ده في أنهي مجال؟

- إيه المشكلة اللي الكاتب بيحاول يحلها؟

- فر في الكتاب كدة، شوف ال Quotes المستعين بيها، ال Graphs، ال مراجع اللي مستعين بيها الكاتب وهكذا..

خلي بالك الكتب طويلة جدا، فمينفعش ندي وقتنا لكتاب واحنا مش عارفين هنستفيد منه ولا لأ، فقبل ما نقرأ أي كتاب لازم نختار كويس، نربط اللى بنقرأه بالسبب، وناخد فكرة عامة عنه..

ـــــــــــــــــــــــــــــــــــــــــــــــــ

** أثناء القراءة..

في فرق بين ال Active وال Passive reading

لأن في النوع الأول أنت بتقرأ عشان تفهم، تربط، تقيم الفكرة، عكس النوع التاني مجرد قراءة عابرة كدة، كلام بيدخل جواك وخلاص..

فعشان تكون قراءتك Active:

-حدد لنفسك وقت كل يوم للقراءة، ولو نص ساعة، بس تلتزم بيها، وتبعد نفسك عن كل المشتتات.

- اتعلم تاخد Notes، ودي أنت وطريقتك، بس ابعد عن ال Highlighting مثلا، لأنه ثبت علميا أنه وسيلة ضعيفة جدا للتذكر، كمان متاخدش وقت كتير في أنك تاخد ملحوظات وتنسى أنك بتقرأ..

- حاول تربط كل حاجة بتقرأها بحاجات أنت بالفعل تعرفها قبل كدة..

ـــــــــــــــــــــــــــــ

**بعد القراءة...

1. التطبيق..

استغل أي فرصة عشان تطبق اللي قرأته، استغل جزء منه وطلع فكرة جديدة، اكتب رأيك في اللي قرأته، وتأييدك أو اختلافك مع الكاتب ده

2. أفضل حاجة أنك تشرح اللي قرأته لشخص تاني، بكلمات بسيطة، كأنه طفل صغير، كل ما تقول الحاجة اللى اتعلمتها أو عرفتها لحد تاني ده هيثبتها أكتر في دماغك..

3. لو عندك 30 ثانية بس تشرح فيهم فكرة اللى قرأته هتعمل إيه؟، وده لأنك محتاج تكون محدد جدا، وقادر تلخص فكرة اللي قرأته جدااا فهل هتقدر تعمل ده؟

أننا نفتكر اللي بنقرأه في وسط عالم مليان بكل المشتتات دي، ده شئ عظيم جدا، احنا مش بنقرأ وخلاص، ولا بنقرأ عشان يتقال أننا بنقرأ، القراءة ممكن تكون نعمة كبيرة أوي عليك، وممكن تكون "كمثل الحمار يحمل أسفارا" شايل كتب بس ورايح جاي على المعارض، بس أنت مش فاهم، مش عارف إيه الفايدة..

قبل القراءة اختار كويس، وخللي عندك سبب لكل حاجة بتقرأها، وخلي قراءتك Active مش مجرد ألة، وطبق اللى بتقرأه من وقت للتاني قدر الإمكان، وقبل كل ده استعن بالله ولا تعجز..