هل البشر أشرار بطبعهم؟

في فيلم The Enigma Code لما Alan Turning قال:

Do you know why people like violence? It is because it feels good. Humans find violence deeply satisfying. But remove the satisfaction, and the act becomes... hollow.

الحقيقة الفيلم نفسه رجعني بالزمن ل "هتلر" الراجل ابو شنب غريب ده، اللى حرق يهود كتير، كتير، لأ كتير أوي بصراحة! وكنت بسأل نفسي طب إزاى؟ ازاى قدر يقنع "إنسان" يعمل كدة في أخوه "الإنسان"! احرق ده، اقتل ده، اضرب ده، ابعت صاروخ عالسفينة دي غرقها باللي فيها! ده هتلر لوحده قتل حوالي 27 مليون بني آدم، فكان السؤال اللي مفروض نسأله..

هو فعلا الناس دي بتعمل كدة ليه؟ بيعملوا كدة عشان لو مسمعوش الكلام هيموتهم مثلا؟ ولا هما عندهم نزعة شريرة فعلا؟

والبشر مؤذيين بطبعهم وكدة؟

المهم كان في تجربة شهيرة جدا عملها دكتور اسمه ستانلي ميلجرام في جامعة Yale... الراجل ده عمل إعلان بيطلب فيه متطوعين لأداء تجربة في التعليم كدة وهتاخد فلوس على ده..

المهم التجربة كانت عن العلاقة بين العقاب والأداء في التعليم، يعني هل كل ما اضربك هتحفظ أفضل مثلا؟ بس مكنش الضرب هنا هو الموجود بل شحنة كهربية بتبدأ من 15 ل 450 فولت! تجاوب صح تبقى زي الفل تجاوب غلط تتكهرب يا معلم! فبتروح بتختار دور من الاتنين يا مدرس يا طالب.. وتتعمل قرعة، اللى طبعا في كل مرة انت هتطلع الاستاذ عشان يعرفوا هتعاقب اللى قدامك لحد فين!

فبالتالي التجربة بتختبرك انت شخصيا، مش تعليم ولا نيلة، بتختبر أذيتك للي قدامك هتوصل لحد فين!

المهم النتائج كانت مرعبة لأن حوالى 65% وصلوا بالكهرباء لحد 450 فولت! رغم ان الشخص اللى بيتكهرب عمال يصرخ ويقول بموت، انا عيان مش عايز اكمل!(طبعا هو بيمثل).. بس كان الشخص المراقب عالتجربة دايما بيقول للأستاذ (اللى هو انت): كمل، لو سمحت كمل، لو سمحت كمل التجربة، احنا لازم نكمل!

فكانت الجمل دي بتخللي الشخص يكمل عادي، رغم إن أخوه الإنسان بيموت عالجانب الأخر من الأوضة!

للأسف نتج من التجربة إن احنا بنطيع الأوامر كل ما يكون في سلطة اعلى مننا هي اللى بتقولنا اعملوا كذا، وده دور القيادة اللى كان حد زي هتلر بيعملوا كويس جدااا.

بس اللى كنت مستغربه يمكن إن ده بيتكلم على طبيعة الطاعة، وأسبابها النفسية، بس الناس اللى بتستمتع بأذية الغير مكانها فين؟

الحقيقة الموضوع معقد جدا، يعني كمية الناس اللى بتمر بيك، ويطلعوا عينك، بيعملوا كدة ليه؟ يعني زميلك في الشغل،ومشاريع الكلية، والبنت اللى انا حبتها يخرب بيتها محبتنيش وكدة!

يعني ليه العالم نفسه بقة مكان ضلمة،وهل النقاش الفلسفي الأبدي بتاع هل الناس اتولدوا وفي قلوبهم خير، والشر ده وصلهم من البيئة والتعامل، ولا هما أصلا أشرار وبيحاولوا يكونوا أشخاص أفضل؟ النقاش ده له نهاية ولا لأ، الله أعلم الحقيقة..

المصادر:

1. http://www.nature.com/scientificamericanmind/journal/v22/n5/full/scientificamericanmind1111-56.html

2. The Experimenter Movie 2015