ليه بنقدر نحل مشاكل الناس واحنا لأ؟

أنا ممكن أحل مشاكل خلق الله، بس أجي عند مشاكلي الشخصية وأقلب "بطة بلدي"، تفتكر ليه؟

بص يا سيدي دي مش مشكلتك ولا مشكلتي دي تقريبًا حاجة كدة موجودة من أيام ما اتخلقت المشاكل نفسها، يعني خللي حد يحكيلك مشكلة ما عنده، حاجة في الشُغل، في الدراسة، مشاكله مع خطيبته، هتلاقي نفسك تلقائيًا عمال تطلعله حلول ودلالات ومنطق، و1+1، والدين بيقول إيه، وشغلانة..

..

لكن تخيل لو وقعت أنت في نفس ذات المشكلة؟

حلول أقل، منطق أقل، شاورما كتير عشان التفكير اللي هتبذله، وفي النهاية هتاخد قرار غلط عادي جدا أو يمكن تصيب ويطلع صح...احنا كرييتيف جدا في حل مشاكل غيرنا..

طب ده ليه؟

بص يا سيدي، كل واحد فينا عنده ما يُسمى بال "Mindset" أو "طريقة التفكير" اللي بتساعدنا في أننا نقول أرائنا وكدة، المهم في كل مشكلة بتقابلنا احنا بنتخذ طريقة تفكير معينة..

بعد حوالي 8 دراسات على ما يقرب على 1000 شخص، ادوهم ليستات مطاعم، وظائف، فرص سفر، وحاجات شبه كدة، وجدوا إن اختيارات الناس لغيرهم كانت مختلفة تماما عن اختياراتهم لنفسهم، مش بس كدة، لأ ده كمان الوقت في التفكير، التحليل في كل اختيار كان بيختلف دايمًا..

واللي طلعوا بيه من نتاج التجربة دي أننا في حالة لو هناخد قرار لنفسنا فبيكون عندنا ما يسمى بال "Cautious Mindset" أو طريقة التفكير التحفظية أو الحذرة، اللى فيها بتكون عامل حساب لكل حاجة، بتعمل خطط كويس، ومش بتاخد Risk بشكل كبير!

على عكس لما بنيجي ناخد قرار لغيرنا بيكون عندنا ما يسمى بال "Adventrous Mindset" أو اتجاه للمغامرة أكتر، واللي فيه مش بتحسبها أوي، عندك اختيارات كتير، مش متحيز لاختيار على حساب التاني، وتقدر تشوف كل البدائل بعين واحدة، ومش خايف فعلا من أي حاجة..

يعني لو زميلك بيقولك هسيب الشغل مثلا، طب أقولها بحبك دلوقتي؟

هتقوله اه طبعا لازم تسيب الشغل عشان 1.2.3 وتقعد تعددله في أسباب منطقية، وأه لازم تقولها بحبك أنت هتخسر إيه يعني؟ لكن لو أنت بقة ؟

هتفكر 100.000 مرة قبل ما تسيب الشغل، طب بعد ما أسيب هعمل ايه؟ يا ترى عندي بديل؟ طب كدة صح ولا غلط، طب ليه يا دنيا الواحد بيقرب من ناس بايعاه؟

أقولها بحبك دلوقتي؟ لا يا عم هتطلع نار من بقها وكدة!

..

طب ازاى نستفيد من الكلام ده بقة؟

1. يعني طالما الوضع كدة، بيبقى لما تيجي لبعض القرارات لازم يكون عندك "Mentor" وهو الشخص اللى مر بنفس التجربة دي قبل كدة ونجح فيها، قد يكون زميل في الشغل، زميل دراسة أكبر منك، بس ال Mentor هو اللي هيخليك تاخد طريق بياخد سنة في شهر..

2. حاليًا تقريبًا في ابليكشن لكل حاجة ومقال لكل حاجة، يا راجل ده لو محتار في ألوان الدهانات هتلاقي ابليكشن يظبطها، لو عاوز ديكورات هتلاقي Pinterest مثلا..

3. في ناس بتتطبق نظرية ال "هو" مش "الأنا" في اتخاذ القرارات، يعني بدل ما يسألوا نفسهم مفروض أعمل إيه؟ لأ بيكون السؤال "مفروض هو يعمل إيه؟" يعني بيتخيلوا شخص ما في مكانهم، يعني لو كان بابا هنا كان هيعمل ايه مثلا؟ لو كان "ناجح" مثلا هنا كان هيعمل ايه : D

4. القرار الغلط بينتج من توافر معلومات كتير فبيخليك حذر أوي، أو معلومات قليلة فمش بتاخد قرار أصلا ،المشاعر، وكلام الأهل والناس، دول حاول تخليهم جانبًا عشان تسلك..

الخلاصة إن القرار ده شئ مش سهل ولا بيتاخد في قعدة، خد وقتك في تفكير وشوف النقاط دي، واعرف أنت ماشي بأنهي Mindset عشان تسهل على نفسك فرصة اتخاذ قرار سليم، وبرضه سيبها على الله احنا هنكفر؟ استعن بالله ولا تعجز..

المصادر:

Decisions for Others Are More Creative Than Decisions for the Self.

Evan Polman and Kyle J. Emich.

https://journals.sagepub.com/doi/pdf/10.1177/0146167211398362

ليه بناخد قرارات غلط؟

https://www.facebook.com/Ahmed.Nageh93/posts/1587890744653115

- Why It’s Easier to Make Decisions for Someone Else.

https://hbr.org/2018/11/why-its-easier-to-make-decisions-for-someone-else