ليه بنشرب قهوة سادة في العزاء؟

زماااااان أوي أوي لما كانت مصر منبر العلم والعلماء وبييجي ليها طلبة من كل حتة في العالم، كان من الطلبة دول مجموعة من الطلبة من دولة "اليمن" الشقيقة واللي كانوا بيتعلموا في الأزهر، واللى كانوا بيجيبوا القهوة دي معاهم من اليمن عشان تساعدهم في التركيز وتنبههم..

بالتدريج ابتدت تخرج القهوة من دوائر الطلبة، لحد ما انتشرت بين عامة الشعب وابتدت تظهر محلات بتقدمها، الناس ابتدت تفوق، يتجمعوا لشربها، وهنا جه دور رجال الدين اللى قالوا إن المشروب ده "حرام"، حرام ازاى يا عم الشيخ ده بيفوقني مش بيسكرني! فقالك لأ طالما بيلعب في الدماغ سواء بيفوق أو بيغيب العقل فهو حرام، بعدين سيدنا محمد عليه أفضل الصلاة والسلام مكنش بيشرب قهوة، فإذا دي بدعة! وعشان كل بدعة ضلالة وكل ضلالة في النار فإيه بقة؟

واستمر تحريم القهوة فترة طويلة، بسبب الفتوى اللى قدمها الشيخ ""أحمد بن عبد الحق السنباطي"، وفضلوا بقة يتناقشوا فيها كدة زي ما بنناقش المسائل الخلافية في العقيدة كدة، والشيوخ في المنابر بقة تطلع تنادي بتحريم ده، والناس تفضل تقول ليه، يا جدعان وربنا بتفوقنا وتخلينا نشتغل، ونركز أحسن! أبداااا، حرام يعني حراااام..

الحقيقة إن تجارة القهوة كانت انتشرت في مصر وقتها، وأصبح في تجار وأماكن بتقدمها، فحصل كدة تضارب مصالح كبير جدا، وبدأت المظاهرات وحصلت خناقات كتير بين مؤيدين القرار بحرمانية القهوة، ومابين المعارضين.. في واحدة من الخناقات دي واحد مات!، مات دفاعا عن القهوة! دخل الشيخ السنباطي ومؤيديه المسجد، وحاصر المسجد المعارضين من شاربي القهوة، ومعاهم أهل القتيل! وبالليل في نفس اليوم عمل أهل القتيل صوان قدام المسجد، وقدموا فيه قهوة سادة عشان يضايقوا الشيخ ومعارضيه اللى كانوا جوة ..

وتدخل السلطان العثماني في الوقت ده "مراد الثاني"، عشان ينهي الحصار ده، وقام بتعيين مفتي جديد أباح شرب القهوة عادي ، وده كان انتصار للتجار ومؤيديهم وأصبح الصوان والقهوة السادة عادة عند المصريين من أيام الدولة العثمانية..

طب ليه المياه جنب الفنجان؟ الحقيقة إن ده برضه من أيام الدولة العثمانية، ودي كانت عادة عندهم، لما تكون في زيارة مثلا بيتقدملك القهوة ومعاها مياه، فلو شربت القهوة قبل المياه، فمعناها إنك مش جعان، أما لو شربت المياه الأول، فده معناه إنك جعان ، فيبدأ أهل البيت في تحضير أكل ليك..ومن وقتها برضه فضلت دي عادات بنتوارثها ومش عارفين أصلها إيه :'))

أما عن انتهاء القهوة في العالم، في تقارير كتير جدا بدأت في الظهور من 2012 بتقول إن نتيجة لارتفاع درجات الحرارة والاحتباس الحراري في العالم، وإنتشار الفطريات اللى بتأثر على زراعة القهوة، فبدايىة من سنة 2050 هتبدأ أنواع معينة تنتهي من القهوة، وبحلول 2080 المشروب ده هيكون اختفى تقريبا.. المصدر: https://goo.gl/nBztGZ