عُض يدي ولا تعُض حبيبي..

لو أنا وفلانة بنحب بعض جدا وبنتشارك في حب الكتابة، والقراءة، والجري وركوب العجل مثلا، لكن في نفس الوقت أراءنا السياسية مُختلفة، فالحاجات الأولى هي "Rewards" أو فوائد مشتركة كل واحد مننا بياخدها من علاقته بالطرف التاني، واختلاف وجهة نظرنا السياسية اللي ممكن تعكنن علينا أحيانًا هي "Cost" كل واحد مننا بيدفعها في مقابل إن علاقتنا تفضل متزنة فبنقبل اختلافنا ده..

ورغم الاختلاف في النقطة دي أنا مبسوط، وال "Cost" أو الحاجة المش كويسة مش هي نهاية الدنيا بالنسبة لي، وأقدر أتعايش معاها، وده اللي اسمه ال "Comparison level"..

فبالتالي المعادلة تكون:

Rewards - Costs - Comparison level= Satisfaction

الرضا عن وجود شريك حياتك ده، لأنك شايف أن الـ "Rewards" أو الحاجات الحلوة بينكم أكبر من ال "Costs" أو الحاجات اللي مش قد كدة بالإضافة كمان إن معندكش "Comparison" أو مقارنة قوية بشخص تاني في حياتك ممكن يقدملك اللى ناقص عند شريك حياتك فأنت شايف شريك حياتك 100 فل وعشرة..

ثم!

ثم تأتيك هذه المرأة الرائعة اللي هتغطيلك الللى ناقص في شريك حياتك!

وده اللي اسمه ال "Comparison level of alternative" يعني حاليًا في عامل تاني في المعادلة دخل فأصبحت المعادلة الأولى اللى كان نهايتها "الرضا" والسعادة بين الشريكين مهددة دلوقتي بـ Alternative أو شخص بديل!

فأصبحت المعادلة الجديدة:

Satisfaction - Comparison level of alternative= ??

في الحالة دي لو مستوى المقارنة زاد، هيغطي على رضاك، ولما رضاك عن علاقتك الحالية يقل، مع الوقت الشخص "البديل" هيكون "شريك" كويس بالنسبة لك، ليه؟

لأنه حقق المعادلة الأولى خالص فوق، بيديك فوائد أكتر من الCosts اللي تقدر تتحملها وهكذا، وكل ده اسمه ال Social Exchange theory..

اللي بتقول أن كل شخص بيدور دايمًا على الرضا عن طريق أنه يكون عنده "Rewards" أكتر وده حقه، في ظل تقبل ال Costs اللي هيدفعها..

لكن ايه اللي يخلي ظهور شخص رائع في حياتنا ميهددش استقرار علاقتنا؟

الحقيقة العامل الأخير في المعادلة دي هو الـ "Investment"، يعني قد إيه أنا بدي في علاقتي أساسًا، قد إيه أنا مش ببص برة، ومش بدور أساسًا على بديل، ولا بحاول، وببذل عشان علاقتي تنجح، وبقدر اللي قدامي..

فتكون المعادلة ازاى بقة؟

Satisfaction - comparison level of alternative + Investment= Commitment.

فالـ "Commitment" هو اللي هيخليك في علاقة قوية مع شريك حياتك، وكل ما كنت بتبذل في علاقتك، كل ما كل البدائل اللى ممكن تشوفها هتقل تدريجيًا، كل ما هتكون راضي ومبسوط، فأنا بحب فلانة اللى متفقة معايا في كذا وكذا، بس مختلفة في كذا، بس أنا راضي ومبسوط، ومش لاقيلها بديل، ولما لقيت بديل هيديني اللي ناقص، مجرتش عليه، عشان أنا عندي "Commitment"، ومستعد أبذل جهدي عشان أخلي علاقتي تنجح، وأكون راضي، فكل حاجة تستاهل لازم تاخد مجهود، استعن بالله ولا تعجز..