ليه البشر بينتقموا؟

ماشي في الشارع في أمان الله، وجه واحد سرق منك تليفونك وهو بيجري؟ مش لو كان عندك فرصة1% بس إنك تقلب عليه الكرة الأرضية وتجيبه وتعاقبه بسبب فعله ده هتعملها صح؟ طب على الوجه الأخر مش هو كمان لو عارف إن في نسبة 1% إنك تجيبه مكنش هيفكر يعمل حاجة وحشة معاك؟ لو كل واحد فكّر كويس وهو بيعملنا حاجة يأذينا بيها إننا ممكن نردله أضعاف،مش كان هيفكّر ألف مرة قبل ما يعملها؟

"الانتقام" أو ال "Revenge" هو واحد من الصِفات المتأصلة في البشر واللى راح ضحيتها ملايين في حروب مختلفة، وياما ناس عاشت وماتت عشان تعوض جزء من حاجة بس راحت منها، وعلى الرغم إن أوقات الانتقام بيكون مٌكلِف، بيكون أوقات الحاجة اللى هترجعها أرخص بكتير من المجهود والفلوس اللي هتبذلها، وإن زي ما بيقولوا "Even Killing the dog will not cure the bite".. بس برضه لازم تاخد حقك، العين بالعين يعني، أه العضة بتاعتي مش هتخف، وهيكون غير منطقي إني أقتل الكلب يعني، بس برضه بندور وبنعمل شتى الطرق اللى بيها نقدر نسترجع ولو جزء من اللى الأذى اللى حد اتسببلنا بيه...

في لعبة إسمها "Trust game" عملها عالم سويسري هدفها إنها تكشف عن الثقة بين البشر ودي قواعدها: أنت هتكون قاعد في اوضة وواحد تاني قاعد في أوضة تانية، مش بتشوفوا بعض، ولا تعرفوا بعض، وهندي لكل واحد فيكم 10$.. إنت دلوقتي معاك 10$ ومعاك حل من الاتنين: 1. تاخدهم وتمشي.. 2. تديهم للشخص التاني (اللي أنت متعرفوش).. ولو قررت تديهم للشخص التاني، الفلوس مش هتروحله 10، لأ الفلوس هتروحله 4 أضعاف يعني كدة هيبقى معاه 40 + ال 10 بتوعه فيبقى معاه 50..

وهيبقى معاه حل من اتنين برضه : 1. ياخد الفلوس دي كلها ويمشي. 2. يا إما هيقسم بينك وبينه، وبكدة تاخد أنت 25 وهو 25، وتكسبوا أنتم الاتنين!

الحقيقة لو بنتكلم اقتصاديًا، فأنا هيبقى عندي مشكلة، أنا ايه ضمني إنه هيرجعلى حاجة، فبالتالي مش هديله من الأساس، وبالمنطق لو حد بقة معاه 50 بدل 10 هياخدهم ويمشي.. فنظريا محدش من الاتنين هيدي ال 10$ بتاعته من الأول للحد التاني، وبكدة تتقفل اللعبة من أولها!

لكن بفرض أنك اختارت إنك تضحي ووضعت ثقتك في الشخص ده واديته ال 10$، وبكدة الشخص التاني بقة معاه 50 ومشي بيها، أنت كشخص خسرت كل فلوسك، هتعمل إيه؟، أنت مش بس خسرت فلوسك، أنت خسرت "الثقة" اللى أنت حطيتها في شخص مجهول..

وقتها في التجربة دي دخل شخص تالت بيطبطب على الشخص الخسران ده، وبيعرض عليه خدمة، وهي إن بص يا سيدي أنا عندي استعداد اخدمك إنت مش عاوز ترجع حقك وتندم الراجل ده على اللي عمله وإنه هرب بالفلوس؟ أنا هساعدك، ومع كل 1$ هتدفعهولي، هجبلك من الشخص ده 2$، لو أديتني 4 هجبلك منه 8$، ولو ادتني 25$ هجبلك منه 50$.. فلو أنت مكان الشخص ده هل هتعمل الخطوة دي؟ هل هتدفع المبالغ دي وأنت أصلا خسران 10$ بس، وهتقعد تخسر تاني، في سبيل بس إنك تنتقم من الشخص ده؟

الحقيقة أغلب الناس عملت الخطوة دي، ومقالتش لأ أنا هخسر أكتر من اللي خسرته، وفي نفس الوقت وهما بياخدو القرار ده بالانتقام، كنا بنسجل كهرباء المخ عندهم، فلقينا حاجة عجيبة جدا!!

لقينا إن ال "Reward system" هو أكتر مكان بينشط، وده الجهاز اللى مسؤول عن التعزيز، عملت حاجة بتبسطك ده بيشتغل فيطلب تاني، وده معناه إن بطريقة ما فالانتقام "بيبسط" وإن الأشخاص اللى عندهم حجم أكبر وأكتر من خلايا مُخهم في ال"Reward centre" ده هما برضه ناس هياخدوا قرارات أكثر عُنفًا..

الحقيقة إن "الثقة" و"الانتقام" هما وجهان لعملة واحدة، لو الشخص اللى بيسرقني عارف إني ممكن أجيبه ولو بنسبة 1% عمره ما هيفكر يعملها، وكذلك لو حد خان ثقة حد مش بتكون نهاية كويسة، لذلك في المجتمعات المتطورة بيلعبوا على إن كل حاجة تكون Win-Win أنت تكسب وأنا أكسب، أبني ثقة في الناس، لكن رغم إن "الانتقام" أو "الجزاء" ده ساعات كتير بيحدد سلوك البشر ويردعهم إلا إنه حتى لما بيحصل هو مش بيعوض عن الأذى اللي حصل من البداية..