كام واحد بيخاف من الكلاب؟

في كام واحد بيخاف من الكلاب؟ تقريبا كدة والله أعلم إن مفيش حد مش بيخاف من الكلاب غير الناس اللى مربيين الكلب أصلا، ما عدا ذلك فهيكون الكلب بالنسبة لهم هو الكائن الأكثر فزعًا على الإطلاق، واللي ممكن يمنعك من النزول بالليل، ويخليك تغير الطريق، ويعلمك تاخد سبرينتات، ده غير إنه على رأي استاذ محمد رمضان:"علميًا، الانسان اللى بيجري وراه كلب سرعته بتتضاعف!" بس هو الكلاب وحشين أوي كدة؟ - في كتاب "How to win friends and influence people" واللي كتبه ديل كارنيج ونزلت أول نسخة منه سنة 1936، واللي الحقيقة من أفضل الكُتب اللى ممكن تقرأها في حياتك على مستوى العلاقات وفهمها; كان في أحد الفصول بيقول:

"Did you ever stop to think that a dog is only animal that doesn't have to work for a living? A hen has to lay eggs, a cow has to give milk, and a canary has to sing. But a dog makes his living by giving you nothing but love." لوهلة كدة هتلاقي إن فعلا الكلب هو الحيوان الوحيد يمكن اللى مش هتستفيد من إنتاجه مثلا زي الفرخة اللى بناخد بيضها، البقر بناخد اللبن بتاعهم، فالكلب هو اه للحراسة وكدة بس عادي يعني هو كل الناس عندها كلاب؟، الكلب هو الحيوان الوحيد اللى مش بيعمل حاجة في حياته غير إنه يكون مخلص ليك وبيحبك.. ودي كانت أحد النقط في الكتاب اللى بتقولك يعني إنك لو عاوز بجد تكسب الناس، وتكون شخص مؤثر فخليك مُهتم بالناس واديهم حب دون شروط..

بعد زمن طويل بنكتشف فعلا إن مفيش حد بيحب حُب غير مشروط، نادر جدا تلاقي شخص بيتقبلك كدة بعيوبك وبمساوئك، ولو لقيته بتحس إن معاك مُعجزة جداا. في وقت ما كانت مُسيطرة عليا شخصيًا فكرة إن "الأب والأم" هما الوحيدين في العالم اللي ممكن يحبوك حب غير مشروط، إلى أن وجدت أنه عادي على فكرة في شواذ كتير جدا للفكرة دي، وفي آباء وأمهات ممكن يكفروا عيالهم حرفيا، مش يحبوهم!

الصورة الموجودة هي صورة للرسام "فيودور ريشيتنيكوف"، وهي مشهورة جدا، اللوحة لطفل راجع من مدرسته، بعد ما سقط ! على جانب الصورة العائلة وهي بتبص للطفل بانكسار وخيبة أمل غريبة، وكأن الولد حياته انتهت، في وقت هو كان محتاج منهم ردة فعل أفضل من كدة..

في حين الجانب الأخر من الصورة "الكلب" وهو بيجري عليه وفرحان بيه، وهو بيحبه وهو ساقط، وبيحبه وهو ناجح، وبيحبه في كل الأوقات، في رسالة من الفنان للكبار البالغين بأنهم يعاملوا الولد زي ما "الكلب" بيعامله!

الحُب غير المشروط هيفضل مُعضلة بكل الأحوال، ونسمات الحُب اللى بتجيلنا وبنحس فيها إنها غير مشروطة فعلا بتكون قليلة، وللأسف ده من نُدرته بيكون صعب تصديقه، لأ انت مش بتحبني، انت أكيد عاوز مني حاجة، ده أنا فيا وفيا، فبيكون تقبل الحُب ده صعب كمان، فلما تجيلنا نسمات الحب دي من وقت للتاني ممكن نتمسك بيها قدر الإمكان؟