قوة الشخص الانطوائي

إيه ده أنت "انطوائي" ولا إيه؟ للأسف في ظل الانفتاح الحالي، والسوشيال الميديا، والعلاقات بين البشر، بيبتدي يظهرلك علاقات من مع شخصيات جديدة، وهي الحقيقة مش جديدة أوي، كل الفكرة إنك بقيت عارف تضع مُسميات أو توصيف للشخصيات دي النهاردة عاوز أتكلم عن حاجة للأسف بنواجهها حاليا، وهي محاولة وضع قالب الشخصية المثالية كشخص "مُنفتح" "Extrovert"، وإننا نشوف إن ده ال Role model أو النموذج اللى كلنا لازم نبقى زيه، ده الشخص اللي بيشارك، اللي بياخد المبادرة، اللي بيعرف يشتغل في فريق، والنظر لصاحب الشخصية "الانطوائية" "Introvert" على إنه شخص فيه حاجة غلط، شخص مختلف عننا! وده على الرغم من إن أشهر قادة وكتاب ومبدعين العالم كانوا في الأساس أشخاص Introverts!، لكن لازالت النظرة دي للأسف..

طب وهي إيه مواصفات الشخص المنطوي ده؟ 1. ملهومش في الكلام اللي بيخلص في 5 دقايق ده، لأ هما بيحبو "القعدات الطويلة" اللي بيرغوا فيها وبيتكلموا براحتهم (بس طبعًا مع ناس بيحبوهم)! 2. لو موبايلهم رن وحاولت تبص فيه بيتضايقوا جدا، وممكن يكسروه عليك حرفيًا، في حاجة عندهم اسمها "خصوصية" جدا يعني.. 3. أحسن مكان يشتروا منه حاجاتهم هو أقل مكان فيه ناس! 4. مهما كنت قريب منهم سهل جدا متفهمش هما عايزين إيه، هما بيحسوا المسافات دي كويس.. 5. أغلب هواياتاهم هتلاقيها قراءة، كتابة، أو أي حاجة تانية طالما ممكن تتعمل في البيت.. 6. مش يحبوا الأفراح والحفلات والزيطة والدوشة.. 7. ممكن يسافروا لوحدهم وعادي مش بتفرق معاهم.. 8. مش اجتماعيين بس مش معذولين، هما بيختاروا بالظبط مين ممكن يكونوا اجتماعيين معاه ومين لأ! 9. متقلبين المزاج بطريقة كبيرة.. 10. مش سهل أبدا تخدعهم، رغم إن كلامهم قليل، لكنهم فاهمينك كويس.. 11. عندهم مشكلة في التعبير عن مشاعرهم، وكأن الكلام بيقف كدة، فمهما كانت مشاعرهم قوية بيجدوا صعوبة في تحويلها لكلام، بس متقلقش دول لو أتكلموا يبقى جالك الخير والله.. 12. أحسن ناس تديهم أسرارك، هما أساسا مش بيتكلموا في العادي، هيقولوا أسرار؟ 13. أغلب جروبات الواتساب بتاعتهم معمولة Mute لمدة سنة مثلا.. 14. أي حاجة ممكن تتكتب يبقى بلاش تتصل بيا عشانها.. 15. مش سهل يقولوا "بحبك"، بيفضّلوا أكتر يوروك الحب عامل إزاى.. 16. هذا الشخص الانطوائي بيقلب 180 درجة قدام الناس اللي بيرتاح معاهم وبيحبهم، وبيبقى فاكهة الشلة حرفيًا..

للأسف من أخطاء الأشخاص دي أنهم بسبب الضغط المجتمعي فبيحاولوا يتغيروا، عشان يكونوا أشخاص مختلفين منفتحين زي ال Extroverts، وده بيخليهم يخرجوا من البيئة المناسبة ليهم واللي بيرتاحوا فيها، فيحصلهم توتر وخوف، وتقل ثقتهم بنفسهم..

لكن الحل الوحيد لهم هو "تقبل الذات"، فكرة أنهم مختلفين أه، لكن ده أمر طبيعي، طب ليه الشخص المنفتح مش هو اللي مختلف مثلا؟

لازم يدركوا إن العزلة لبعض الوقت أمر مطلوب، الأنبياء نفسهم كانوا بيعتزلوا الناس عشان الوحي ويرجعوا تاني.. العمل الجماعي مش شرط يكون جماعي، طالما بعرف أشتغل لوحدي يبقى أوفر بيئة الشغل المناسبة اللى تخليني أعمل ده بشكل مناسب..

لازم يعرفوا إيه اللي بيميزهم بالظبط، ويشتغلوا عليه، مش إيه اللي ناقصهم ويفضلوا يرهقوا نفسهم بيه، لأن اللى ناقصهم هو نظرة مجتمعية بحتة، ملهاش أي أساس من الصحة..

وأخيرا يا جماعة مفيش حد منفتح ولا حد انطوائي صِرف، احنا بنقع ما بين الاتنين، وده اللي أسمه شخص مُعتدل، فياريت نساعد الناس في تقبل نفسها، وتقبلهم لينا، ومنحاولش نحسن من شخصيتنا في حاجة أصلا مش محتاجة تحسين، أنتم زي الفل يا جماعة عادي والله..استعن بالله ولا تعجز.. References https://www.ted.com/talks/susan_cain_the_power_of_introverts?language=en