خدعوك فقالوا: أنت تقدر تعملها!

لو في حاجة بتعافر فيها بقالك كتير ومش قادر تعملها، عندي ليك الحل!

هات مجموعة من صحابك يقفوا جنبك وكلهم بصوت عالي، يالا يا وحش، أنت تقدر، لو عاوز هتعملها، شوية حماااااس، أكتر، أكتر، إيه ده برضه مقدرتش؟، أني آسف!!

زمااااااان أوي أوي لما كان سيدنا آدم في الجنة هو وستنا حواء، وكانوا بينعموا فيها،وكل حاجة كانت مُتاحة ليهم ماعدا شجرة التفاح، ورغم ده مقدروش يقاوموا وأكلوا منها، وربنا نزلنا من بعدها هنا وبقينا في مصر ولله الحمد، مش ده موضوعنا، بس تخيل معايا كدة سيدنا أدم وستنا حواء هما أشخاص عاديين زينا كدة، أنت سايب حد في البيت مثلا وقولتله تقدر تاخد أي حاجة في التلاجة ماعدا حتة الشكيولاتة دي، ورغم كدة أكلها برضه!

هتقول عليه إيه؟

طمّاع مثلا، بيحب الشيكولاتة ومقدرش يقاوم، طب معندوش إرادة؟ هل هتتحامل عليه وهو المغريات دي قدامه؟

مريض السكر اللى مش قادر يبطل حلويات، المُدخن اللى مش قادر يبطل، الشخص اللى محتاج يخس ومش قادر، هل كل دول معندهمش إرادة، هل هي دي الفكرة؟

يعني لو جيت مسكتهم وكلمتهم، وانتوا تقدروا تعملوا ده، تقدر تخس وتطير من غير جناحات، وأنت تقدر تبطل تدخين، وأنت وأنت وأنت..

بس كدة، هيبطلوا فعلا؟

لحد فترة مش بعيدة كان ال "Self control" شاغل دماغ الناس جدا، وبيدرسوا تأثيره وهل فعلا كل اللى أنا محتاجه هو أني أقدر أتحكم في نفسي؟

خلينا نشوف، بص يا سيدي..

مقاومة الشهوات والرغبات والحاجات الحلوة شئ لطيف مفيش كلام، بس هل ده أمر صحي؟

يعني لو كانت المقاومة وال "Self control" ده شئ كويس ، يبقى مفروض كل ما أقاوم كل ما أكون شخص أكثر نجاحًا، حطني قدام شيكولاتة، قدام رقاصة، قدام أي حاجة ، كل ما أعدي الموقف وأنجح في الاختبار هكون حد كويس؟

في دراسة سنة 2011 على 205 شخص لمدة اسبوع في ألمانيا كانوا طول الاسبوع ده بيتحطوا تحت ضغوط ومواقف واسئلة، وبعد انتهاء التجربة دي، وجدوا أن الأشخاص اللى عندهم "Self control" و اللي كانوا بيجاوبوا أنهم يقدروا "يقاوموا" رغباتهم، هم في الأصل أشخاص مقابلتهمش رغبات ومواقف بنفس القدر اللى قابله الأشخاص التانية..

بمعنى: "إن الأشخاص الأكثر نجاحًا في تخطي الرغبات والشهوات دي، هم الأشخاص اللى متحطوش في مواقف أصلا تختبر قدرتهم على المقاومة"، فاهم حاجة؟

جت بعدها دراسة تانية على 159 طالب مجموعة منهم بتتعرض لمواقف تتطلب المقاومة ومجموعة تانية لأ، وجدوا إن التحصيل الدراسي بالنسبة للأشخاص اللى اتعرضوا لمواقف تتطلب المقاومة كان أقل بكتير من الأشخاص اللى متعرضوش خالص..

وده بسبب أن "المقاومة" هي شئ مُنهِك، شئ بياخد من روحك واحدة واحدة وبيتعبك، وبيشغل تفكيرك..

فنطلع من التجربتين دول بإيه؟

1. في ناس بالفطرة عندهم "قدرة" في التحمل غيرنا، دي ملكة من عند ربنا، بس دول مش كلنا أكيد، لو فاكرين ال Marshmello test بتاع الاولاد الصغيرين ويا ترى هياخدوا ال Marshmello النهاردة ولا يستنوا بكرة وياخدوا الضعف، كان الأغلب مش بيستنى..

2. دايما لما تيجي تعمل حاجة اعملها عشان "عاوز" مش عشان "مضطر"، لو بتجري عشان مضطر تخس، يبقى هتكره حياتك، لكن لو "عاوز" وبتحب ده هتكمل، فمتجبرش نفسك..

3. أعد تصميم حياتك:

بمعنى متحطش نفسك في أماكن وموضع المغريات وتطلب من نفسك المقاومة، يعني اظبط المنبه وخليه بعيد عنك مش جنبك لو عاوز تصحى، متختبرش قدرتك على الصبح كدة، متعديش من قدام محل الحلويات لو مش هتقدر تقاوم، متحطش نفسك وسط شلة بنات طالما مش هتقدر تقاوم برضه، متختبرش نفسك تاني وتالت وعاشر..

لأن ال "Self control" ده "قرار" مش "اختبار" لنفسك، فبدل ما كل ما كل مرة تختار المقاومة، طب ما تجرب تختار "تفادي" المواقف دي أحسن...

أخيرًا يعني، الموضوع صعب والإنسان "ضعيف" حرفيا يعني، وكم الحاجات اللى محتاجينها وقاعدين بنقاومها كتير جدا، فلما تيجوا تدعموا حد بلاش فكرة "لو عاوز" لأنه أكيد عاوز يبطل كل حاجة، سيدنا آدم نفسه غلط، لما كانت الشجرة حواليه ومقدرش يقاوم، فبصوا على مشاكلكم ومشاكل اللى حواليكم بطريقة مختلفة، وهتلاقوا حلول كتير غير إننا نقعد نخفزهم على المقاومة بس إن شاء الله، استعن بالله ولا تعجز.. المصادر:

1. 2011 study published in the Journal of Personality and Social Psychology, which tracked 205 people for one week in Germany..

https://www.ncbi.nlm.nih.gov/pubmed/22149456

2. What’s So Great About Self-Control? Examining the Importance of Effortful Self-Control and Temptation in Predicting Real-Life Depletion and Goal Attainment

https://journals.sagepub.com/doi/abs/10.1177/1948550616679237

3. Marshmallow test

https://www.vox.com/science-and-health/2018/6/6/17413000/marshmallow-test-replication-mischel-psychology