تعمل إيه قبل ما تحاول تغيير العالم؟

في فئة من الناس بتسعى لتغيير العالم، بيدوروا على الشغف في كُل حاجة بيعملوها، ومش بيبخلوا بأي مجهود حيال مُستقبلهم، علاقاتهم، وأثناء رحلتهم المُستمرة وبحثهم دايمًا أنهم يكونوا أفضل في نهاية الطريق بيجدوا إن الأمر مكنش مستاهل ده كله يعني وإن في النهاية طلعت محصلة بعضها!

في فترة كدة في حياتك محتاج فيها تهدأ، بدل ما تدور على المثالية وتغيير العالم ده، لأ أنت محتاج "عيشة طبيعية" في الأول، والعيشة الطبيعية دي شئ صعب جدا على فكرة، يعني تخيل معايا كدة إيه معايير الصحة النفسية مثلا؟

1. المرونة العقلية.

2. التكيّف مع الضغوط.

3. النضج في إدارة الانفعالات.

4. علاقات متوازنة.

فأعتقد إننا محتاجين ندور على تحقيق أكبر نسبة نجاح في ال4 حاجات دول الأول، بعدين نطلع من بيئتنا الداخلية دي لمرحلة تانية وهي أننا نشوف الدنيا برة مالها بقة..

النُضج "العقلي" مش السِن هو الحاكم في الأمر بمعنى إن كمية التجارب اللى بتمر بيها هتشكل فيك زي ما هي عايزة، بس في حاجات خللي بالك منها أثناء التغيرات اللي بتحصل فيك دي:

1. في مرحلة مُتقدمة من النُضج هتلاقي مساحة "اللا مبالاة" في تفكيرك هتكون كبرت جداا، وإن بعض الأمور فعلا مكنتش تستاهل كل التفكير والقلق ده، فاتعلم تقلق على الحاجات المستاهلة، وفكّر بمنطقية أكتر، واتعلم ترتب أولوياتك كويس..

2. الحياة مش مستاهلة كل "الجد" ده، يعني أعتقد لو ركزت بس على كون حياتك بسيطة، وتكون "هيّن، لين، سهل" هيكون أفضل بكتير بدل ما تموت وعندك ضغط وسكر مثلا..

3. هتلاقي نفسك بقيت بتتفرج على الأفلام من منظور تاني، يعني بقيت بتتعاطف مع الشخصيات الشريرة عادي، وبتتمنى البطل يموت ساعات، هتقدر موقفهم وأنهم كانوا عايزين ينتصروا برضه، وهتتضايق من تصدير فكرة الخير اللى دايما بينتصر ده، فخلي بالك واعرف مبادئك كويس، وحافظ عليها، عشان ده زمن فتنة..

4. هتكتشف إن الانشغال بالقراءة عن الحياة، والعزلة، عمره ما هيديك خبرة زي ما تخرج من بيتكم وتعيشها، عيش الحياة متقرأش عنها ولا تتابعها على انستجرام مثلا..

5. هتعرف إن أنت مش "حُر"، وأن حريتك توقفت عند ولادتك، أنت مخترتش اسمك مثلا، اتولدت مصري عادي، مجتمع بيطحنك وبيختارلك تعليمك ووظيفتك، وهتقعد سنين من عمرك بتتدافع عن حاجات أنت مختارتهاش أصلا من البداية، فلما يجيلك وقت ويبقى عندك فرصة اختيار اختار حروبك كويس، واعرف هتبدد طاقتك فين!

6. هتعرف إن النوم سلطان، وراحة البال مهمة، وال"عادي مش مستاهلة" اسلوب حياة..

7. هتعرف إن أغلب مشاكلك كانت بسبب "الفراغ"، فلو قدرت تتغلب عليه حياتك هتتغير كتير..

8. هتلاقي أن تعاليم أهالينا بتاعة الكدب ملوش رجلين، والأمانة، وعدم الغش، الحاجات دي مهمة جدا وهتفضل مهمة، عشان في الزمن ده كل حاجة بقت "عادي" وغايات بتبرر وسائل، فمتتاعملش على أنه عادي، الغلط غلط حتى لو كل الناس بتعمله!

كاتبنا الرافعي كان بيقول "فلا تسأل يا بُني عن الحياة ولكن سل هؤلاء الأحياء: أيُّكم الحيّ؟

فمرة كمان، قبل ما تدوروا على المثالية يا جماعة، اهتموا بنفسكم، وافهموها، وحاولوا تكونوا كويسين من الداخل قبل ما تشتكوا من عدم جدوى إصلاح العالم الخارجي، ولا تكن جسرًا يعبر بك الناس إلى الجنة، ثم تدخل أنت مع ذلك النار!، استعن بالله ولا تعجز..