استراتيجيات التحكم بالشعوب

في مايو سنة 1979 في راجل اسمه "نعوم تشومسكي"، ممكن تكون قابلتله كتاب، أو قريتله جملة معينة في وقت ما، المهم الراجل ده لقى ما يُدعى بـ "وثيقة سرية للغاية" حاجة كدة شبه ملفات أجهزة الأمن مثلا وكانت الوثيقة دي بعنوان "الأسلحة الصامتة لخوض حرب هادئة" (Silent Weapons For Quiet War).. ودي عبارة عن دليل ارشادي كدة أو كتاب صغير كتبه مفكرين وسياسيين ورأسماليين وشوية خبراء في مجالات كتير وطرابيزات بلياردو وبينج، وهدفه أنه يكون زي مرجع كدة يقولك لو عايز تتحكم في الشعوب ممكن تعمل إيه؟

بعدين عم "نعوم" قالنا ده في 10 نقاط، فركز في اللي جاي وشوف بيحصل إيه منهم في أي بلد محل اهتمامك:

1. The strategy of distraction

- استراتيجية "الإلهاء"، أو"خليهم يتسلوا".. ”حافظوا على اهتمام الرأي العام بعيدا عن المشاكل الاجتماعية الحقيقية، اجعلوه مفتونا بمسائل لا أهمية حقيقية لها“. استغل وسائل الاعلام في التضليل، اعرض حاجات تافهة، احجب معلومات، فكك من أي برامج علمية أو تعليمية، املأ وسائل الاعلام بـ "التوافه"، حسسهم إن الدنيا تمام، ومفيش مشاكل، وانقل واقع غير الواقع..

2. Create problems , then offer solution.

- اخترع مشكلة من لا شئ، وحطلها حلول! يعني مثلا اخلق ازمة اقتصادية، شيل منتج معين وخللي الناس تستنجد بيك، فارجع نزله السوق بسعر أغلى!، اعمل مشكلة أمنية، فالناس تطالبك بمحاربة المجرمين، فتفرض قيودك الأمنية براحتك..انت دايما المشكلة والحل!

3.The gradual strategy

- استراتيجية التدرج، بمعنى إن صعب جدا إن شعبًا ما يقبل فكرة زيادة أسعار حاجة من 1 إلى 10 في مرة واحدة، لكن لأ ممكن نخليها تبقى بـ 2 بعدين بـ 3 بعدين بـ 5 بعدين بـ 7.5 بعدين بـ 10.. كدة أحسن مش كدة ؟ أصل نظريا مستحيل حد هيصحى يلاقي حاجة اتضاعفت عليه 1000% ومش هيتكلم مثلا..

4. The strategy of deferring

- استراتيجية "التأجيل".. بذمتك لو قولتلك بصوت كله حنية كدة يا جماعة البلد بتقع، احنا اقتصادنا بينهار ، احنا لازم نعمل حاجة، لازم نتألم ونتقشف، بس مش هنعمل ده دلوقتي، بس هنعمل الإجراءات التقشفية دي واحدة واحدة كدة لحد سنة 2050 مثلا.. ده للأسف بيمشي ليه؟ عشان أنا مش هعاني حاليا + الناس دايمًا بتصدق جملة "لاتقلق، غدا أفضل"..

5. Go to the public as a little child

- متخاطبش الناس على قدر عقولهم، لأ خاطبهم على أنهم أطفال! أنت متوقع لما يكون طريقة كلامك، اعلاناتك، الكلمات نفسها اللى بتختارها تكون موجهة لعيل عنده 12 سنة مثلا، هيكون رد فعله زي واحد بالغ عاقل؟ طبعا لأ، هيتعامل على أنه طفل برضه!

6. Use the emotional side more then the reflection

- كلم الناس بالعاطفة، استخدم مشاعرهم واستدرجها، كلمهم بصفة الدين والبلد والروح الوطنية، وإن شاء الله سنغزوا العالم، واحنا أفضل حد في الدنيا وهنبقى قد مش عارف إيه، اديهم حماس، اديهم مشاعر كتير، لكن متقولهمش هنبقى احسن بلد في الدنيا امتى أو ازاى! الجانب التحليلي ده أو أنك تكلم الناس بالعقل غالبا هيفتح عيون الناس، وده ضد النقطة الجاية..

7. Keep the public in ignorance and mediocrity.

- إغراق الجمهور في الجهل و الغباء(أه ترجمتها كدة)، يعني مثلا حسب كلامه إنك تخللي دايمُا في عدم مساواة مثلا سواء في التعليم أو غيره، فالجهل هيبقى عامة الشعب في حالة توهان، مش عارفين حقوقهم بالتالي مش هيطالبوا بيها أصلا..

8. To encourage the public to be complacent with mediocrity.

شجع الجمهور على استحسان الوضع السئ زي مثلا انك توصلهم رسايل دايما اننا زي الفل، أو إن البلد أفضل من بلد كذا وكذا، وإن مش عارف بلد ايه بتدفع كام، واحنا في جنة، برر ضعفك الأمني والاقتصادي بأننا أفضل من 100 ألف مكان تاني بدل ما تصب تركيزك على اصلاح شأنك الخاص، فهيحبوا الوضع الزفت اللى هما فيه وهيسقفولك عليه..

9. Strengthen Self-blame

تحويل مشاعر التمرد إلى الإحساس بالذنب! يعني تفضل طول النهار والليل تصدر للناس أو الشباب جمل من نوعية إن الشغل مرطرط، بس انتوا اللى مش مؤهلين، العيب فيكم يا بهايم، انتوا اللي قاعدين عالقهوة، انتوا اللي معكوش لغة، فبدل ما الشخص يصب غضبه على نظام اقتصادي وتعليمي فاشل، فهو بيصب غضبه على نفسه، ويحس أنه هو السبب في مشكلته، هو السبب في انه مش لاقي شغل والبلد هتعمله إيه يعني!

10. Getting to know the individuals better than they know themselves

اعرف الأفراد أكتر من معرفتهم الشخصية لنفسهم..لأ مش هفسرها دي!

دول كانوا 10 استراتيجيات، اتعملوا قبل كدة، بيتعملوا، لسة هيتعملوا، كل هدفهم زي ما قولنا فوق خالص هو "التحكم بالشعوب".. المعلومة قوة، المعرفة قوة، والجهل ظلمات، التاريخ مش بيعيد نفسه، البشر هم من لا يتغيرون، استعن بالله ولا تعجز!..