إيه أحسن طريقة تعمل بيها حاجة مبتحبهاش؟

لو فكرت شوية هتلاقي إن لو البشر قرروا يعملوا بس الحاجة اللى بيحبوها ده هيرسى على حاجات قليلة جدا، وإن أغلب يومنا بنكون مضطرين نعمل حاجات مش بنحبها أساسًا، طب وبعدين؟، يعني أصلاً الحاجات اللى مش بنعملها دي مفروض أنها بتصنع المجد وكدة!

بص يا سيدي..

تصرفات البشر مبنية على ترتيبات متكررة، وفي عوامل كتير أوي داخلة فيها، يعني الحاجة اللى بتبسط بتقعد تكررها، والعكس صحيح، والحاجة اللى بتعملها بقالها سنين صعب تغيرها في يوم وليلة، المهم في طرق كتير طلعت عشان تكسر العادات وتعلمنا سلوكيات جديدة، أنا شخصيًا تقريبُا جربتهم كلهم ولكن الأحب إلى قلبي هو ال "Domino Effect"..

لو جربت ترص قطع ال Domino ورا بعض كدة وضربت منهم واحد على الطرف، طبعا الصف كله هيقع، وده المقصود، وهو أن التغيرات البسيطة أو الفعل البسيط ده، نتج وراه مجموعة من التصرفات التانية ..

أيوة أنا استفدت إيه؟

لو جربت تعمل عادة واحدة إيجابية ( قول مثلا هتلعب كل يوم 15 دقيقة رياضة في البيت)، هتلاقي نفسك يوم ورا التاني بدأت تغير في أكلك ونوعياته، قللت الأكل برة البيت، قللت الدهون بعدها بشوية بدأت تنام بدري، بعدها بشوية بدأت تقلل قعدتك على الانترنت واستفدت من الوقت ده في الرياضة مثلا..

أنت بدأت بفعل واحد لكن الفعل ده كر وراه كل الأفعال دي هو ده المقصود..

طب ده في الحاجات الايجابية ماذا عن السلبيات؟

أيوة طبعا هيشتغل برضه، يعني لو كل يوم بتنام والموبايل في حضنك، يبقى هتنام ساعات أقل، هتصحى متأخر هتروح الجامعة متأخر، او مش هتروح أساسا، هتضيع وقت كتير وهتبقى دائرة مفرغة وهكذا..

لذلك Professor BJ Fogg في جامعة ستانفورد بيقول:

“You can never change just one behavior. Our behaviors are interconnected, so when you change one behavior, other behaviors also shift.”

طب ال Domino effect ده بيحصل ليه؟

وجدوا إن ده بيحصل لسببين:

1. إن زي ما قولت فوق إن تقريبًا كل أفعالنا متراكمة وليها علاقة ببعضها، لدرجة تخليك تتوقع الشخص اللي بيعمل الفعل الفلاني ده ممكن يعمل ايه في الموقف الفلاني..

2. ال Commitment يا جماعة، يعني رغم بداية التزامك بفعل صغير، لكن هو في النهاية اسمه "التزام"، وكل ما بتشوف الفعل الصغير ده ومدى التزامك بيه وتحقيقك ليه، ده مفروض أنه بيعزز قدرتك على أنك تلتزم بأفعال تانية أكبر..

طب عشان نطبق ده نعمل إيه؟

1. خللي بالك لما تيجي تختار فعل هتكرره، اختار دايما حاجة بتحبها في البداية، متبدأش بالحاجت اللى أنت أصلا مش بتحبها عشان متتعقدش، ابدأ بحاجة بسيطة وسهلة..

2. في حاجة في الفيزياء اسمها "القصور الذاتي" واللي عبر عنها نيوتن في قانونه الأول بتقول: "يظل الجسم الساكن ساكن، والمتحرك متحرك ما لم تؤثر عليه قوة خارجية تغير من هذه الحالة"..

بمعنى إيه، لما تكون خلاص بدأت تنتظم في أداء فعل معين، دخل فعل جديد عليه وأنت لسة مُنتشي بانتصارك، وفرحان، مش تاخد بريك وترجع تبدأ من الأول في فعل جديد ، فاهمني؟

3. ال Domino effect بيعلمك الاستمرارية، فمتبصش أوي على النتائج اللحظية، لأنك بتعمل أفعال صغيرة واحد ورا التاني، فممكن متلاحظش النتائج بدري أوي، فلو أنت لسة هتطبق الموضوع ده، ممكن تبدأ بحاجات صغيرة قابلة للتحقيق عشان متحبطش لحد ما تتعود..

المهم قبل كل ده إنك تدرك إن تغيير فعل أو إضافة فعل جديد ليك بياخد وقت، فحاول قدر الإمكان تبسط نفسك، وتحاوط نفسك بناس تشجعك وقول لأصحابك على انجازاتك الصغيرة، اكتبها عالحيطة وشجع نفسك.. يمكن دي من الحاجات اللى بحبها فعلاً، ويارب تكون حاجة جديدة وتعرفوا تطبقوها..

استعن بالله ولا تعجز..