إزاى نتجنب الأخبار الغلط في السوشيال ميديا؟

بمُناسبة "سارة أبو الخير" فمشكلتها مع ناسا تنتمي لعالم الأخبار (النص كُم) على السوشيال ميديا، وعليه فلازم نعرف الأول إيه أنواع الأخبار اللي ممكن أقابلها على السوشيال ميديا:

1. خبر صحيح، والناس عارفة أنه صحيح:

وده قدامنا حل من اتنين:

- إننا ناخد الخبر الصحيح ده ونعديه عادي (وده طبعا النوع من الأخبار اللى نتمنى انها تنتشر أكتر بدون لعب)..

- أو أننا نزيط على الخبر الصح ده جامد جدا فيتحول ل "بروباجاندا"..

زي خبر زواج مُعز مسعود وشيري كدة، هو خبر صحيح ومفروض يعدي عادي، بس احنا زيطنا عليه جامد وقتها..

2. أو يكون خبر غلط والناس عارفة أنه غلط:

وده برضه هيعدي عادي، زي مثلا صور ماما اللي بتحطها نصها فيل ونصها بطة دي، طبعا ده كلام ما يتصدقش..

- بس يحصل إيه بقة لو الخبر الغلط هو كمان زيطنا عليه جامد وقعدنا نحور فيه؟

هنا بيحصل ما يُسمى "إشاعة"، وده أسوأ أنواع الأخبار على الإطلاق، واللي بسببها بتحصل مشاكل كبيرة، لدرجة إن الفيسبوك بيحاول يحاربه، لأن ده بيخلي المستخدمين يعيشوا تجربة سيئة على فيسبوك، فبدأ ياخد إجراءات كبيرة في الشأن ده..

**طب لو أنا قاعد على فيسبوك، إيه الحاجات اللي ممكن تقابلني فتخليني أكون في تجربة سيئة جدا يعني؟

1.Bad actors:

أو اناس المش كويسة (حرفيًا معلش)، زي ال Fake accounts، وال Spammers وال Hackers، دول طبعا لو وقعت في حد منهم هيعكنن عليك حياتك، وممكن تخسر حسابك وبياناتك هنا.

2. Bad behaviors

ودي السلوكيات اللى مش مُحبب انتشارها، زي برضه ال Spams ، وزي "انتحال الشخصيات"، وتصنيف الناس، والتنمُر، والعنصرية ضدهم..

3. Bad content:

إن المحتوى نفسه اللي بيظهرلك في ال Home يكون فيه مشكلة، زي مثلا الأخبار الكاذبة، والبوستات اللي بتحث على الكراهية، والبوستات اللى فيها لينكات بتطلعك لمواقع تانية مش مضمونة، والصور اللى مفروض متكونش هنا..

طب والحل؟

- الفيسبوك مُتبع لسياسة معينة بخصوص ال 3 نقط دول وبيعمل بالنسبة لهم 3 حاجات:

1. Remove:

ودي بيمسح فيها أو مش بيسمح بوجود خطابات الكراهية، والارهاب، والحسابات المجهولة زي لما عملنا Log out من فترة كدة، كمان بيمسح أي محتوى فيه تنمر واضح..

2. Reduce:

الفيسبوك بيحاول قدر الإمكان أنه يقلل من ظهور المحتوى اللي فيه أخبار كاذبة ولينكات، أو حتى يكون عنوانه غريب جدا وبيجذب الناس عشان تفتحه..

3. Inform:

ودي الفيسبوك بيبلغك فيها أنت داخل على إيه، يعني لو لقيت مقالة مثلا موجودة هتلاقيه بيحطلك علامة تعجب فوقيها كدة لو دوست عليها، هيديك بيانات المقالة دي، والموقع بتاعها، وده مكان موثوق ولا لأ، وكمان لو لينك، هينبهك أنك خارج، وده ممكن يكون فيه ضرر عليك وهكذا..

طب الخلاصة يعني:

للأسف احنا في عصر غريب، والناس بتتجنن على الشهرة، والسوشيال ميديا بتعمل سعر لأي حاجة تافهة فلو مخدتش بالك من المؤثرات اللي بتتعرض ليها هتلبس، دي شوية حاجات ممكن نعملها:

1. مفيش حاجة هتمنع انتشار النوعية دي من الأخبار والأكاذيب غير الناس، الفيسبوك ده Machine، ومهما عمل فهو بيغلط عادي..

2. ممكن لو سمحت تنتبه لأي حاجة بنعملها شير ونتأكد من مصدرها، سواء بسؤال مباشر لصاحب الخبر أو اللي مشيره، ولو مش مُتاح فنستخدم جوجل عادي، للأخبار وللصور هيساعدك جدا..

3. ممكن نحاول نقلل عدد الصفحات الاخبارية اللى عاملينها لايك، لصفحتين تلاتة موثوقين بس، عشان الدوشة الكتير دي..

4. متجريش ورا العناوين الغامضة، والغريبة، واللينكات اللي بتلاقيها سواء في بوست او حد بيبعتهالك، اتأكد الاول انت رايح فين..

5. 94% من الناس بيصدقوا الحاجة اللى متعوب في تصميمها وبيدوها ثقتهم، فمتنخدعش بالشكل الحلو على حساب المضمون..