إزاى تاخد قرار متندمش عليه؟

قراءة الموضوع ده هيكون قرار من ألاف القرارات اللى بتاخدها في يومك، بس هل كل قرار بتاخده صح، هل كل قرار أنت اللى بتاخده بإيدك، ولا فاكر إنك حر فيه؟

ستيفن هوكينج لما اتكلم عن "العبقرية" قال إن العبقرية هي القدرة علي "التكيُّف" يعني كُل ما الظروف حواليك تتغير وأنت تتكيف مع الوضع ده ومتخسرش وتقدر تتعايش يمكن ده شئ عبقري أنك قادر تطوع نفسك على كل الظروف. "العبقرية" مش اني اجيب حل لمشكلة في ثانية، العبقرية متهيألي تبدأ "بالشعور" إن في مشكلة أساسا، لأن ياما ناس كانت فاكرة إن مفيش حد في تفكيرها و ذكائها اللا محدود، وطلعوا في الأخر ماشيين ثور لاهي في برسيمه يعني! وده يمشي حتى مع تعريف الغباء لأينشتين كونه بيقول إنك بتعيد نفس التجارب بنفس الخطوات، ونستني نتايج مختلفة"..

فكمية الحاجات اللي بتستهلكك وبتديها من طاقتك، وأنت عارف النهاية، بس بتجرب تاني وتالت وعاشر، قال يعني يمكن تصيب مثلا، فتقرر أنك تعيد من تاني! ده شئ ممكن تقرأه في كتاب "طبائع الاستهبال للست أم دلال"، يعني أنت بني آدم طاقتك ووقتك ومواردك محدودة، ليه تضيع موردك الأصلي وهو "عمرك" في حاجة أنت مش بتحبها؟ ده يبقى اسمه إيه بذمتك؟

القرارات شئ مش سهل، ممكن تاخد قرار غلط يلبسك في حياتك جدا، جواز، كلية معينة، شغلانة معينة، سفر مثلا وده لأكثر من سبب أهمهم:

1. قلة المعلومات: لو مش عارف المعلومة، مش هتحل السؤال، إجابتك هنا هي القرار، لو مش عارف كل حاجة هتقدر تقرر؟ هتعرف إيه الأنسب، طب إيه الخيارات المتاحة؟ فقبل أي قرار لازم تلم كل المعلومات الكافية عن الحاجة دي، وتسأل الف مرة قبلها بس خللي بالك من رقم 2.

2. كثرة المعلومات: كام واحد معرفش يحل سؤال، رغم أنه كان مباشر جدااا، بس عشان هو معلوماته كتير فأفتكر الممتحن خلاص بيختبر قدراته بقة، وبيستعرض عضلاته فراح للحل الصعب، أو وقف واتسمر ومحلش حاجة؟، لأن عرف كل حاجة حرفيًا، فمبقاش قادر يقرر أيهم أحسن، بس لازم دايما يكون ليك مرجع، وحاجة ثابتة بتستند عليها.. فحاول تفرق جدا بين الحاجات الظاهرة اللى متقبلش النقاش، والحاجات اللى ممكن تلم عليها معلومات..

3. لا مؤاخذة المشاعر! في مثال كدة الشباب بيقولوه بتاع " مانا لو كنت فلانة كنت ساعدتني"، أو مانا لو شعري أصفر!، ومعناه إني لو بنت كان زمانك بتساعدني، عشان مشاعرك بتتحرك ناحيتي، فإحنا اوقات كتير بنيجي على نفسنا عشان مشاعرنا للأسف، بنتقبل إهانة بإسم الحب مثلا، ولو فكرنا بعقلنا للحظات ، في قرارات كتيرة جدا مش هنعملها، عشان محدش يزعل مننا، عشان ميتضايقش، عشان مش عارف إيه، فحاول وأنت بتاخد قرار تفصل لو سمحت وتعرف إيه اللى بيستهلكك كويس!

4. أهلى وعشيرتي والمجتمع والناس! لااا، انا بنتي متتجوزش الجوازة دي، لااا يا بنتي هيمرمطك!، لا يا أحمد انت تستاهل واحدة أحسن منها، على فكرة بقة ابن خالتك جايب أحسن منها، لا يا بني الشقة دي وحشة جدا، العروسة مش قد كدة! الأهل والصحاب للأسف ليهم تأثير كبير جدا في قراراتك، إما أنهم يساعدوك، أو يكونوا نقمة عليك، فحاول تسمع وتفلتر ويكون ليك رأي مش تمشي معاهم وخلاص عشان ميجيش يوم تبقى شخص "معتمد على الأخرين في أتفه قرارته" وفي قول أخر "إبن أمك" لا مؤاخذة!

دول كانوا اهم 4 حاجات متكررين حطهم حلقة في ودنك، وخد قرارك، وحاول تتكيف معاه، ومع الظروف اللى هتتبع قرارك ده لأنك حر في القرار، بس العواقب لازم تقبلها، و التكيف ده هو العبقرية، ومتستناش حاجة تتغير وأنت بنفس الدماغ لأن ده غباء، واستعن بالله ولا تعجز..