أشخاص خطر على حياتك 10

بيقولوا إن أي شخص هو نِتاج ال "5" أشخاص اللى بيقضي مُعظم وقته معاهم! فى بحث اتعمل على تقريبًا "مليون" شخص لمجلة "TalentSmart" واللى دايما بتتكلم فى منطقة ال Emotional Intelligence، وجدوا أن 90% من الأشخاص الناجحين وعندهم قدرة في التحكم في مشاعرهم تحت الضغط، هما في الأصل أشخاص قدروا يكون في حياتهم أقل عدد ممكن من "العلاقات الغير صحية" (Toxic relationship).. وقالوا أن ال10 شخصيات دول لو حد منهم موجود في حياتك فأنت يمكن تكون مش في أحسن حال:

1. يالا نعيّط يا جماعة ( دور الضحية)! اللى فاكردايما إن الكون ضده، كل حاجة بتحصله صعب يحلها وان خلاص حياتنا ضاعت، ويالا نعيّط يا جماعة بدل ما يكون عقلاني ويحسبها و يفكّر فى حلول ويتعلم ويشتغل على نفسه.. “Pain is inevitable, suffering is an Option” فلازم نمر بلحظات الألم، بس مش لازم خالص نسيبها تبقى محور حياتنا..

2. البائس أو (المزاجي)! والمقصود بيه مش الشخص اللى يوم زعلان ويوم فرحان لأ خالص، المقصود هو الشخص اللى دايما مبيبقاش عنده القدرة للتحكم فى مشاعره، وممكن ييجي يرمي ليك كل حاجة فى اعتقاده أنك السبب فيها! ممكن يكون مخليك سلة الزبالة اللى بيرمي فيها كُل حاجة .. في كتاب 48 قانون للقوة الكاتب كان بيقول إنك لازم "Avoid the Unhappy and the Unlucky" المشاعر مُعدية جدا، ومين جاور السعيد إيه؟

3. مركز معلومات الكون ( النمّام): والمقصود الشخص اللى بيكون محور حديثه دايما عن مين عمل، ومين راح فين، ويفضل يخترع في حواديت، ممكن فى البداية يكون الأمر مُسلي واشطة بنتكلم عن فُلان ونشوف أخطاؤه بس بعد كدة الأمر بيكون مرهق جدا، وبيرمي عليك تعاسة مش لطيفة! ومتنساش إن النميمة أساسا هتدخلكم النار بطبيعة الحال.. روزفلت (رئيس أمريكا السابق) كان بيقول: "Great Minds talk about ideas, average minds talk about events, and small minds talk about people”

4. أنت مش محور الكون يا تيمون! اللى مش شايف غير نفسه، واللى دايما بيتكلم عن إنجازاته، وعن قد ايه سافر وقد ايه عمل، وعلى فكرة كان يقصدني في البوست ده، ده هتلاحظه كتير فى الخروجات لما متلاقيش نفسك موجود جنبه اساسا، جميل أننا نتكلم عن إنجازاتنا الصغيرة، بس الجميل أكتر أننا نشارك مش نقعد نسقف بس..

5. ما تجيب الورد ده وكأني انا اللى شاريه (الحسود)! اللي دايما مش راضي باللى معاه وشايف إن ابسط حاجة معاك هي حاجة كبيرة جدا، وان مهما وصل مش هيكون راضي عن نفسه ومهما وصلت هيقلل من انجازك، للأسف يمكن في رأيي الشخص الغير راضي ده يمكن أخطر حد ممكن يعدي عليك..

6. المُستغل! اللى بياخد مش بيدي، مبيسألش عليك غير في أوقات معينة، مفيش مشكلة إن العلاقة تبقى مصلحة، بس متبقاش صحوبية وفي نفس الوقت مصلحة طب إزاى؟، لأن في فرق بين أننا نقعد فترة منتكلمش بس عارفين أننا أصحاب، وفي فرق واحنا عارفين أننا مش هنتكلم غير لو في مصلحة، عامة ربنا يسخرنا لخدمة عباده بكل الأحوال، بس خللي بالك برضه..

7. الدمنتور! ودول الكائنات اللى كانت فى هاري بوتر بياخدوا أرواح الناس! والمقصود هما الناس اللى بتنشر طاقة سلبية دايما واللى دايما عايشين مع بعض فى مآسي، دايما مش بيشوفوا غير العيوب اللى فينا، وشاطرين جدا في إنهم يبروزوها، الدمنتور كانوا بياخدوا السعادة وروح الناس، فمتسمحش لحد يطفيك..

8. اللي بيفرح في المصايب.. اللى بيكون راضي بس لما يحصل للناس حاجة وحشة! أنت مُتخيل؟ وده يعتبر نوع من أنواع السادية خللى بالك، الناس اللى بتتلذذ بألم الأخرين، اللى هو فلان سقط، تلاقيه فرحان، احنا ممكن نحس إن ده عقاب من ربنا وأنه جابلنا حقنا من فلان مثلا، بس أكيد مش طول الوقت، محدش سوي مفرض يفرح في مصيبة حد..

9. محكمة شمال القاهرة! أو الشخص اللى بيصدر أحكام عالناس بشكل مستمرفقعدتكم كلها بص دي عاملة ازاى؟ هي قلعت الحجاب ليه؟ لأ انت حياتك مش عاجباني، عندي ليك طريقة سهلة عشان مش عارف تعمل ايه! بيتدخل في كل شئ ظنًا منه أن ده كويس وبيفيد الناس، لكنه بيكون مؤذي جدا لبعض الناس، وقعدتك معاه هتكرهك في نفسك..

10. لم الفلاحين من العزبة وهات الكرباج (المُتكبّر)! اللى طالع فيه جدا، هو مش محتاج حد يقولك متتعاملش معاه مثلا، أنت كدة كدة كارهه، هو دايما شايف فى كل حاجة بتعملها مقارنة خاصة بيه، ودايما مُضيع للوقت ومش مركز غير فى انه يكون أحسن ما فيكم مهما كان بتعملوا إيه..

هو بكل الأحوال كلنا فينا قدر من الحاجات دي، بس المهم ميبقاش ده الجزء اللي طاغي علينا، وبقدر الإمكان منتأثرش باللي حوالينا.. الشخص اللي ظاهرة فيه حاجة منهم قادر دايمًا يحطك تحت ضغط عصبي، فحاول دايما لما تقدر تتعرف على حد كدة، حاول تتعامل معاه بال "حقائق" مش ب "المشاعر"، اتعلم تفصل بين مشاعرهم ومشاعرك وتقلل تفاعلك مع مشاعرهم. أنا عارف إننا لازمن نبدي تعاطفنا مع أصحابنا، بس محدش بيكون 360 يوم في السنة حزين مثلا، محدش طول السنة بيحكم على الناس، فاهمني؟ فحاول ترسم حدودك وتتوقع تصرفاتهم كويس عشان تقدر تتعامل معاها، عشان يكون ال 5 اللى حواليك عالأقل في علاقات صحية وعندهم قدر من السلام النفسي، وكلها في النهاية حروب كل واحد بيخوضها مع نفسه، فاستعن بالله ولا تعجز!